دغه پنځه ورځنۍ روزنیزه برنامه د اوبو له سرچینو څخه د ښې ګتې اخیستنې او دمحاسباتو دښه مدیریت په موخه دیادو وزارتونو د ۲۶ کارکوونکو د وړتیالوړولو په پار په لاره اچول شوې ده.

ددې برنامې په پرانست غونډه کې د کرنې، اوبولګولو او مالدارۍ وزیر نصیر احمد درانی ددغو روزنو پر اهمیت خبرې وکړې او ویې ویل: «افغانستان هغه هېواد دی، چې لږې اوبیزې سرچینې لري نو دې ته په کتو د اوبو مدیریت ته جدي اړتیا لیدل کیږي، نو په همدې موخه دغه روزنې موږ ته ډېر اړین دي او باید له دغو روزنیزو پروګرامونو څخه سمه استفاده وکړو.» ښاغلی درانی دغه روزنیزې برنامې ډېر اړین وبلل او په افغانستان کې د هالند سفیر او د ملګرو ملتونو دخوړو او کرنې له سازمان څخه په دې برخه کې د لازیاتو مالي او تخنیکي همکاریو غوښتونکی شو.

دغه راز په افغانستان کې دهالند سفیر ارنست نورمان د اوبو په برخه کې د خپل هېواد د تجربو یادونه وکړه او ویې ویل: «که څه هم چې هالند ددې برخې تخنیکي او روزنیزې برخې پرمخ وړي، خو بیاهم کومې تجربې چې موږ یې لرو افغانستان سره د اوبو د مدیریت په برخه کې همکاري کوو.» د هالند سفیر په دې برخه کې له افغانستان سره د خپل هېواد د هر اړخیزو همکاریو ژمنه وکړه.

په ورته وخت کې په افغانستان کې د ملګرو ملتونو د خوړو او کرنې سازمان «FAO» مشر رجیندرا کومار اریال د افغانستان او نړۍ په کچه د اقلیم پر بدلون او اوبیزو سرچینو خبرې وکړې او ویې ویل: «هالند د اوبو د مدیریت په برخه کې کافي تجربه لري او په افغانستان کې د اوبو دمدیریت په برخه کې یې تجربې ډېر اړین دي.» اریال په خپلو خبرو کې افغانستان هغه هېواد وباله چې اوبه یې کمه ده او په افغانستان کې د اوبو د کنټرول په برخه کې دهالند د سفیر د لا زیاتو تخنیکي او مالي مرستو غوښتونکی شو.

دغه راز د اوبو د کنټرول نړیوال متخصص ویم بیسنسټن چې، ددې برنامې له روزونکو څخه دی وویل افغانستان هغه هېواد دی، چې د باران له لارې په کال کې ۲۰۰ ملي متر اوبو لري او دغه اوبه د استفادې لپاره ډېر کم دی، نو دهغه په خبر «باید د اوبو د کنټرول په موخه پراخې مطالعې وشي او خپل اوبه کنټرول کړو.»

دغه روزنیزه برنامه اته پړاوونه لري. شپږ پړاوونه یې په دوبۍ، دهلۍ او هانګ کانګ کې په لاره اچول شوې وه او ټاکل شوې، چې دوه نور پړاوونه یې د افغانستان دکرنې په وزارت کې په لاره واچول شي.