هلمند کې د انګورو بڼونه او حاصلات ډېر شوي دي

۶ چنګاښ ۱۴۰۰
د هلمند په ولایت کې د انګورو د فصل په رارسېدو سره د هلمند د کرنې ریاست وایي، چې د یاد ولایت انګور پاخه او بازار ته وړاندې شوي دي. ددوی په خبره هلمند کې به سږ کال د انګورو حاصلات د تېر کال په پرتله ډېر وی.
د هلمند د کرنې رییس زلمی الکو وايي تمه ده، چې سږ کال به د هلمند د انګورو له بڼونو څه باندې ۹۵زره ټنه حاصلات تر لاسه شي.
د هلمند د کرنې رییس زلمی الکو وايي چې دامهال په ۶۹۳۵ هکټاره ځمکه کې د انګورو تاکونه او باغونه شته، چې د تېرکال په پرتله ددې ولایت د انګورو بڼونو شمېر زیات شوي دي او هڅه کوي، چې دا شمېر لا هم زیات شي.
 زلمي الکو وویل، چې له دغو بڼونو څخه به سږکال څه باندې ۹۵ زره مټریک ټنه انګور تر لاسه شي.
د ښاغلي الکو په خبره په هلمند کې ډول ډول انګور تولیدېږي او دا چې د هلمند انګور د نورو ولایتونو په پرتله ژر حاصل ته رسېږي، نو په بېلابېلو ولایتونو کي ښه مارکېټ هم لري.
هلمند کې د انګورو ګڼ شمېر باغونه شته چې د تېرو کلونو سره په لوی توپیر یې د حاصلاتو په کیفیت او کمیت کې هم د پام وړ بدلون راغلی دی.
د هلمند انګور د یو شمېر ولایتونو لکه زابل، غزني، میدان وردګ، نیمروز او کابل تر څنګ بهرنیو هېوادونو لکه پاکستان او هند ته هم صادرېږي او ښه بازار هم لري.
باید وویل شي، چې په دې وروستیو کې، د کرنې وزارت له خوا ددې ولایت په مرکز او ولسوالیو کې عصري ممیزخونې هم جوړې شوي دي او د انګورو بڼوال کولای شي، چې په کې په ښه کیفیت سره خپل انګور په ممیزو بدل او بازار ته یې وړاندې کړي.