پکتیا کې د ځنګلونو د بیارغونې او پراختیا په موخه د چهارمغزو نیالګيو د وېش لړۍ پیل شوه
د پکتیا ولایت دکرنې، اوبولګولو او مالدارۍ ریاست له لورې ددې ولایت د مرکز په ګډون په اریوب ځاځی، پټان، میرزکه، شواک، ګرده څیړۍ، وزي ځدران، لجه منګل او احمد خیلو ولسوالیو ته ۶۰۰۰ د چهار مغزو نیالګي را انتقال او یادې ځنګلاتي ټولنو د غړو څخه د نیال کولو او لسو کالو پورې ساتنې، پالنی او اوبو ورکولو په موخه ترې تعهد لیکونه واخیستل شول او نیالګی ورته عملآ ووېشل شول.
د کرنې، اوبولګولو او مالدارۍ وزارت او پکتیا د کرنې ریاست پلاوی د ځنګلونو د بیا رغونې په برخه د یادېو ټولنو اړوند سیمې انتخاب کړي دي ترڅو یاد نیالګي په کې کښېنول شي.
د پکتیا د کرنې، اوبو لګولو او مالدارۍ ریاست مسئولین وایي، چې د ځنګلونو په بیارغونې سره به د ژوند چاپېریال ته د ورپیښو زیانونو مخه ونیول شي او له بزګرانو يې وغوښتل، چې خړوبولو، ساتنې او پالنې ته یې ځانګړې پاملرنه وکړي.
