ګوشتې ولسوالۍ کې د څاڅکي اوبوخور په سیسټم سمبال، د لیمو یو سوداګریز بڼ جوړ شو
۲ تله ۱۳۹۸
د ننګرهار ولایت په ګوشتې ولسوالۍ کې د لیمو یو سوداګریز بڼ، چې د څاڅکي اوبوخور په سیسټم سمبال دی جوړ او پرانېستل شوه.
دغه عصري بڼ د بڼوالۍ د پرمختیا ملي موسسې « ANHDO» په مالي او تخنیکي مرستو د دوه میلیونه او ۴۰۰ زره افغانیو په لګښت جوړه شوې ده.
په هغه غونډه کې، چې په ګوشتې ولسوالۍ کې ددې سوداګریز او نمایشي بڼ د پرانېستې په موخه جوړه شوې وه د ننګرهار مرستیال والي تمیم عارف، د کرنې رییس انجنیر سمیع الله نصرت، د ګوشتې ولسوال غالب مجاهد، سیمه ییز چارواکي او د همکارې موسسې مسوولینو هم ګډون در لود.
د ننګرهار د کرنې رییس انجنیر سمیع الله نصرت وایي، چې دغه بڼ یو سوداګریز او نمایشي بڼ دی، چې د افغانستان په بازارونو کې د لیمو د حاصلاتو د زیاتوالي لامل کیږي.
ښاغلي نصرت وایي، چې د سوداګریزو بڼونو د جوړولو په پار بنسټیزې چارې د نورو ګټو ترڅنګ د سوداګریزې بڼوالۍ په برخه کې د خصوصي سکټور د پانګونې لامل کیږي.
د ننګرهار د کرنې رییس وایي؛ په دغه بڼ کې د لیمو یو زر او ۱۰۰ نیالګي اېښودل شوي دي. په دغه بڼ کې د ځانکړو پلاستیکي پیپونو له لارې اوبه د لیمو نیالګیوته لېږدي او د څاڅکي په سیسټم هره نیالګي ته اوبه ورکول کیږي.
د دې بڼ په جوړولو کې ۲.۴ میلیونه افغانۍ پانګونه شوې ده. ددې بڼ د جوړولو یوه موخه د څاڅکې په سیسټم سمبال اوبوخور ترویج ده ترڅو اوبه بې ځایه مصرف نه شي او په کافي اندازه ونو ته اوبه ورسیږي او نورو ځمکو ته هم اوبه بسنه وکړي.
