ننګرهار د شاتو د تولید په برخه کې تر ټولو مخکښ ولایت

دهقان (بزګر) اوونیزه
ننګرهار د افغانستان ختيځ کې پروت ولایت دى. یاد ولایت ۲۲ ولسوالۍ لري؛ اچين، بټي کوټ، چپرهار، هسکه مېنه، ښېوه، خوګياڼي، شېرزاد، پچيراګام، حصارک، کوټ، نازيان، سپين غر، غني خېل، ګوشته، مومندره، لعلپوره، بهسود، سره رود، دره نور، دوربابا، رودات او کامه یې ولسوالۍ دي.
ننګرهار چې، د ځانګړې هوا او غوره کرنیزو تولیداتو له کبله هميشه بهار يې هم بولي د بېلابېلو شاتو او ګلانو په لرولو سره د شاتو د توليد په برخه کې د هېواد تر ټولو مخکښ ولايت دی، چې سږ کال په دې ولایت کې ۵۰۰ مټریک ټنه شات تولید شوي دي.
د ننګرهار د کرنې، اوبولګولو او مالدارۍ ریاست چارواکي وایي، چې په ننګرهار کې د شاتو مچیو نږدې ۶۰۰ لوی او واړه فارمونه شتون لري، چې له ۳۵ تر ۴۰ زره د شاتو کورنۍ په کې روزل کېږي.د چارواکو په خبره، د ننګرهار د شاتو مچیو په فارمونو کې له ۲۲ تر ۳۰ ډوله د شاتو مچۍ شتون لري او په دغو فارمونو کې نږدې دوه زره ښځینه او نارینوو ته د کار زمینه هم برابره شوې ده.
په دې وروستیو کلونو کې په ننګرهار کې د شاتو مچیو د ساتلو دود وده کړې او هغه شمېر کسان، چې په دې ولایت کې د مچیو فارمونه لري، وايي چې د شاتو مچیو په ساتلو سره یې تر ډېره برېده اقتصادي ستونزې هوارې شوي دي او له همدې لارې د خپل ژوند لومړنۍ اړتیاوې پوره کوي.
په دې ولایت کې د شاتو مچیو لرونکي وايي، چې د شاتو مچۍ په کم وخت کې توليد پیلوي او دغه راز د شاتو د مچیو ساتل د اقتصاد له پلوه د ارزښت وړ ګڼل کېږې، ځکه د شاتو مچیو په روزلو سره د زیات شمېر کسانو په ژوند کې مثبت بدلون راغلی دی.
د ننګرهار په سیمه ییزو بازارونو کې په منځنۍ کچه د یوه کیلو ګرام شاتو بیه له ۲۵۰ تر ۵۰۰ افغانۍ ده. ددې ولایت شات د کابل په ګډون یوشمېر نورو ولایتونو کې هم پلورل کېږي.
دغه راز د کرنې وزارت په همکارۍ، ننګرهار کې د شاتو مچیو روزونکو د کاروبار د غوړېدا او ددې ولایت د مچیو روزونکو د ملاتړ په پار د شاتو د کیفیت معلومولو یو لابراټوار هم جوړه شوې ده.
یاد لابراټوار په دې ولایت کې د شاتو مچیو د صنعت د ودې او د شاتو د معیاري تولید او پروسس په موخه جوړه شوې ده.
د کرنې وزارت له خوا د دولت، موسسو، شاتو مچیو روزونکو او د شاتو تولیدوونکو ترمنځ د اړیکو ټینګولو او بازار موندنې په پار ننګرهار ولایت کې د شاتو مچیو ټولنه هم جوړه شوې ده. دغه ټولنه د کروندګرو او شاتو مچیو روزونکو د ستونزو هوارولو ترڅنګ د شاتو مچیو صنعت ته د ودې ورکولو او د شاتو د تولید په برخه کې هم کار کوي.
د ننګرهار د شاتو مچيو روزنې د ټولنې د چارواکو په خبره، د ننګرهار شات د هېواد په بېلابېلو ولايتونو کې خرڅيږي، چې دمګړۍ په هلمند، بلخ، کابل او هرات کې فعالې څانګې لري او ترڅنګ يې د نورو ولايتونو پر هټيوالو هم خرڅيږي. ياده ټولنه په ننګرهار کې د شاتو د توليد پنځه کارځايونه هم جوړې کړي دي.
ننګرهار د شاتو مچيو روزلو او شاتو توليد لپاره مناسبه هوا او چاپېريال لري او دا ددې لامل شوې، چې په دې ولایت کې د شاتو مچيو روزلو صنعت ورځ تر بلې وده وکړي.
افغانستان کې د ننګرهار، بدخشان، تخار، بلخ، هلمند، پنجشېر، پروان، کاپيسا، غزني او هرات ولايتونو شات تر نورو نوموتي شات دي. د شاتو مچيو روزلو لپاره تر ډېره غرنۍ سيمې او هغه سيمې چې پاکه هوا، طبيعي بوټي او ګلان ولري غوره بلل کيږي، چې په يادو سيمو کې د روزل شويو مچيو شات تر نورو ښه کيفيت لرونکي او غوره شات دي.