لوګر کې د اوبولګولو د شپږو شبکو د رغولو چارې بشپړ او ګټې اخیستنې ته وسپارل شول

۱۶ لېندۍ ۱۳۹۸
د بزګرانو د حاصلاتو د لوړولو او د اوبو له ضایعاتو څخه د مخنیوي په پار د کرنې، اوبولګولو او مالدارۍ وزارت، له خوا د لوګر ولایت په مرکز او ددې ولایت په محمدآغې ولسوالۍ کې د اوبولګولو د شپږو شبکو د بیارغولو چارې بشپړ او ګټې اخیستنې ته سپارل شوي دي. د اوبولګولو دغه شبکې، چې د کرنې وزارت په کرونده کې د اوبو د تنظیم پروژې له خوا رغول شدي دي، د لوګر ولایت د مرکز او ددې ولایت د محمدآغې ولسوالۍ د «دجانان، دهنه ملک، میرسیدمحمدولي، افضل بیگ، سیدانو کلي او ملک نورمحمد» د کلیو ۱۱۴۵ هکټاره ځمکه خړوبوي. د اوبولګولو یاد بشپړ شوي شبکې د کرنې وزارت په کرونده کې د اوبو د تنظیم پروژې (OFWMP) له خوا د ۴۵ میلیونه، ۸۲۴ زره او ۳۶۳ افغانیو په لګښت رغول شوي دي.

د اوبولګولو له دغو شبکو څخه زرګونه کسان په مستقیم او غیر مستقیمه توګه ګټه پورته کوي او ۱۱۴۵ هکټاره ځمکه یې د خوړبولو تر پوښښ لاندې دي.

دیادو شبکو په بیارغونه کې د سیمې یوشمېر اوسیدونکو ته دکار زمینه هم برابره شوې وه او ترڅنګ یې ۴۰ سلنه د اوبو له ضایعاتو څخه مخنیوی کوی او همداراز د هغو ځمکو کرنیز محصولات به هم ۲۵ سلنه لوړ شي، چې د ددغو شبکو له لارې خړوبیږي.