ننګرهار کې د شولو تولیدوونکو او پروسس کوونکو ترمنځ هوکړه لیکونه لاسلیک شول

۱۲ لړم ۱۳۹۸
د کرنې، اوبولګونې او مالدارۍ وزارت له دویم ملي لومړیتوب څخه د ملاتړ پروګرام «SNaPP2» په همکارۍ په ننګرهار کې د شولو تولیدونکو او پروسس کوونکو ترمنځ هوکړه لیکونه لاسلیک شول.
دغه هوکړه لیکونه د کرنیزو محصولاتو د بازار موندنې په موخه د شولې تولیدوونکو او د شولو پروسس او وریجو تولیدوونکو شرکتونو ترمنځ لاسلیک شول.
د ننګرهار د کرنې، اوبولګولو او مالدارۍ رییس انجنیر سمیع الله نصرت وویل، چې د یادو هوکړه لیکونو موخه د پروسس د کمپنیو (میلونو) سره د تولیدوونکو نښلول دي تر څو له یوې خوا د تولیدوونکو محصولاتو ته بازار موندنه وشي او له بلې خوا پروسسکوونکو ته خام توکي برابر شي.
د يادونې وړ ده چې، د کرنې وزارت له دویم ملي لومړیتوب څخه د ملاتړ پروګرام له خوا پر دغو بزګرانو د شولو اصلاح شوی تخم، سره او کاري توکي وېشل شوې او همدارنګه د شولو په کرودندو کې د مهارتونو په هکله بېلابېل روزنې هم دغو بزګرانو ته ورکړل شوي دي.