د ننګرهار د شیشم باغ د کرنې په څېړنیز مرکز کې په بېلابېلو کرنیزو توکو څیړنې روانې دي
۸ زمری ۱۴۰۱ ه.ش
۱ محرم الحرام ۱۴۴۴ ه.ق
د ننګرهار ولایت د شیشم باغ د کرنې په څیړنیز فارم کې د بېلابېلو کرنیزو توکو څیړنې د اصلاح شوي تخمونو او د بوټو د ناروغیو د کنټرول او پېژندنې په موخه روانې دي.
د ننګرهار د کرنې ریاست د کرنیزو خدماتو امر نعمت الله اکبري او ور سره مل پلاوي چې، له دې څیړنیز فارم څخه یې لیدنه کول وویل، چې په یاد فارم کې د جوارو ژر رسه تخم د تولید لپاره ۸۰۰۰ متره مربع، د شولو ژر رسه تخم تولید لپاره ۱۱۰۰۰ متره مربع، د سویابینو د تخم د تولید لپاره ۲۰۰۰ متره مربع او د مېوو د تخم د تولید لپاره ۴۰۰۰ متره مربع په سیمه کې تجارب کرل شوي دي، چې په ټولو تجاربو اګرانومیکې عمليي ترسره شوي.
د ننګرهار دکرنې، اوبولګولو او مالدارۍ ریاست چارواکي وایي، چې په دې څېړنه کې د نباتاتو د اصلاح، اګرانومي او د ناروغیو د مطالعې سیټونه شامل دي، چې تر څېړنې لاندې نیول شوي دي.
د ننګرهار د کرنې ریاست چارواکي وایي، چې ددغو څېړنو پایلې د کرنې له کارپوهانو، متخصصینو او بزګرو سره شریکیږي، ترڅو په راتلونکي کې د یاد محصولاتو د ښه او ډېر تولید په پار کوټلي ګامونه واخیستل شي. ددې ترڅنګ په دې څېړنیز فارم کې بزګرو، ځمکوالو، د کرنې پوهنځی او د کرنې د انسټیټوټ زده کړیالانو ته هم د کرکېلي په بېلابېلو برخو کې د عملي او نظري زده کړې زمینه برابره شوې ده.
د ننګرهار دکرنې، اوبولګولو او مالدارۍ ریاست هلې ځلې کوي، چې په دې ولایت کې د کرنې، مالدارۍ او بڼوالۍ د ودې په پار څېړنیز پروګرامونه پلي کړي. ددې ادارې د پلان پر بنسټ د شیشم باغ په څېړنیز فارم کې د حبوباتو، سبو او مېوو پر تخمونو او ددې ترڅنګ د بڼونو داصلاح، ترویج او تکثیر په پار بېلابېل څېړنیز پروګرامونه ترلاس لاندې نیول شوي دي، ترڅو د بزګرانو او بڼوالو د پوهې کچه لوړ او د قناعت وړ حاصل او عاید تر لاسه شي.
