د هلمند ولایت کرنې ریاست اړوند څېړنیز فارم کې دغنمو پر ٤٠ ډوله تخمونو څېړنې روانې دي
۲۹ کب ۱۴۰۲ه.ش
۹ رَمَضانُ المُبارَک ۱۴۴۵ه.ق
د هلمند ولایت د کرنې، اوبولګولو او مالدارۍ ریاست اړوند، بولان څېړنیز فارم کې د غنمو پر ٤٠ ډوله تخمونو څېړنې روانې دي.
د څېړنو دغه چارې دغنمو د ناروغیو د مخنیوی، قوي او لوړ حاصل، د اوبو، خاورې او هوا سره د توافق په برخو کې د مسلکي کارکؤنکو لخوا ترسره کېږي، چې په پایله کې به یې مورني، هستوي او بنیادي تخمونه ورڅخه راټول او بزګرانو ته ور وپېژندل شي.
د یادو تجاربو له بشپړولو وروسته به په اټکلیز ډول د غنمو نږدې ١٢٠٠٠ متریک ټنه مورني اصلاح شوي تخمونه په لاس راشي، چې راتلونکي کې به د کرنې وزارت د کړنلارې له مخې د اصلاح شویو تخمونو تصدیو ته د ترویج او تکثیر په موخه په واک کې ورکړل شي.
نوموړې تصدۍ به وکولای شي، چې دغه تخمونه د کرنې ریاست فني کارمندانو تر نظارت لاندې په خپلو ځمکو کې وکري، چې له مخې به یې د غنمو دغه اصلاح شوي تخمونه زیات شی او بیا به تر زرګونو بزګرو پورې ورسول شي.
اصلاح شوي تخمونه د سیمه ییزو او غیر اصلاح شویو تخمونو په پرتله څو سلنه لوړ حاصلات ورکوي، چې تر څنګ یې د نباتي ناروغیو په مقابل کې هم زیات مقاومت لري.
د هلمند ولایت کرنې ریاست هڅه کوي، تر څو په کرنیزو او څېړنیزو فارمونو کې د بېلابېلو نباتاتو د تخمونو د اصلاح ترڅنګ د مېوه لرونکو ونو نیالګیو په اصلاح او تکثیر هم کار وکړي.
