کندز کې پر لسګونو بڼوالو د بڼوالۍ توکي ووېشل شوې
١٨ لیندۍ ۱۴۰۲ه.ش
٢٦جُمَادَى الأول ۱۴۴۵ ه.ق
د کندز دکرنې، اوبولګولو او مالدارۍ ریاست د ترکیې هېواد د ټیکام مؤسسې په تخنیکي همکارۍ د کندز ولایت د مرکز په ګډون ددې ولایت د یوشمېر ولسوالیو پر ١٢٠ بڼوالو د بڼوالۍ توکي وېشلي دي.
د کندز دکرنې، اوبولګولو او مالدارۍ رییس الحاج مولوی امان الله حسن وویل، چې په مرسته شویو وسایلو کې هر بڼوال ته یوه بېلچه، د درمل شیندنې پمپ، ۵۰ کېلو ګرامه سپین سره، لاسي کراچۍ او یو شمېر نور اړين وسايل ورکړل شوي دي.
ښاغلی حسن وویل، چې ددې مرستې موخه د بېوزله بڼوالو ملاتړ، د عصري بڼوالۍ دودول او په ټوله کې ددې ولایت بڼوالۍ ته وده او پراختیا ورکول دي.
