هلمند کې زرو تنو مالدارانو ته د څارویو خوراکي توکو د وېش تر څنګ روزنه ورکول کېږي
۱۶ سلواغه ۱۴۰۲ه.ش
۲۴ رَجَب المُرَجَّب ۱۴۴۵ ه.ق
دهلمند ولایت د کرنې، اوبولګولو او مالدارۍ ریاست د بشري خیریه مؤسسې په همکارۍ، ددې ولایت په مرکز لښکرګاه کې ١٠٠٠ تنو مالدارانو سره د حیواني خوراکې د مرستې ترڅنګ د روزنې لړۍ پیل شوی دی.
د یاد روزنیز پروګرام له لارې نوموړیو مالدارانو ته د څارویو د ښې روزنې، د ناروغیو مخنیوي او درملنې، د محصولاتو راټولولو او بازار ته د وړاندې کولو او د کیفیت او کمیت له پلوه د حیواناتو د روزلو په اړه زده کړې هم ورکول کېږي.
همدارنګه یادو مالدارانو ته د روزنیز پروګرام په وروستیو کې د اړتیا وړ د څارویو خوراکي توکي هم وېشل کېږي.
بلخوا د هلمند دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د افغانانو لپاره د ډنمارک کمېټې «ډاکار» په تخنیکي همکارۍ د هلمند ولایت د مارجې ولسوالی ۹۰ تنو بزګرانو او مالدارانو سره د بېلابېلو توکو مرسته وشوه.
د یادې مرستې په لړ کې هربزګر ته د شېدو د انتقالولو ډبه، د شړومبو لمریزه ډبه، فلزي سطل او د درمل شیندلو ډبه شامل دي.
نوموړو بزګرو او مالدارانو ته تر دې وړاندې د مالدارۍ په برخه کې زده کړې ورکړل شوې وې چې دامهال ورته یاد توکي ووېشل شول.
دهلمند ولایت د کرنې ریاست هڅه کوي، چې په دې ولایت کې کرنې او مالدارۍ ته د بېلابېلو پروګرامونو له لارې وده او پراختیا ورکړي، ترڅو د کورنيو محصولاتو صادرات مو پیاوړي او د بې کیفیته وارداتو کچه ټیټه شي.
