د خوست د موسی خېلو په غلنګ کې د اوبولګولو کانال ګټې اخیستنې ته وسپارل شوه

۱۶ مرغومې ۱۳۹۹
د خوست د کرنې، اوبولګولو او مالدارۍ ریاست چارواکي وایي، چې ددې ولایت د موسی خېلو ولسوالۍ اړوند د «غلنګ» سیمې د اوبولګولو د کانال رغنیزې چارې بشپړ او ګټې اخیستنې ته وسپارل شوه.
یاد کانال په ټولیزه توګه د دوه میلیونه او ۴۶۴زره افغانیو په لګښت د خوست د کرنې ریاست په هغږۍ د «ټېلو موسسې» په مرسته په پاخه او اساسي ډول رغول شوې ده او څه باندې ۱۱۶ جریبه کرنیزې ځمکې خړوبوي او ترڅنګ یې د یادې سیمې ۲۳۴ کورنۍ هم ورڅخه هر اړخیزې ګټې پورته کوي.
د خوست د کرنې ریاست د چارواکو په خبره د یاد کانال په جوړېدو سره یوشمېر للمي ځمکې هم د خړوبولو ترپوښښ لاندې راغلي او ترڅنګ یې د اوبو د ضایعاتو مخه نیول شوی دی.
د یاد کانال رغول ددې ترڅنګ چې د اوبو د ضایعاتو مخه نیولي د نږدې ۵۰۰ کروندګرو کورنیو کرنیز حاصلات هم ۲۰ سلنه زیاتوي.