د بڼوالۍ ځنځیري ارزښت د پراختیا پروژه لوګر کې دکچالو ۷۸ زېرمتونونه جوړوي
۱ لیندۍ ۱۳۹۹
د کرنې، اوبولګولو او مالدارۍ وزارت د بڼوالۍ ځنځیري ارزښت د پراختیا د پروژې له ارې د لوګر په ولایت کې د کچالو د ۷۸ زېرمتونونو رغنیزې چارې د کرنیزو محصولاتو مدیریت د پروژې په اډانه کې، ۹۵ سلنه بشپړ کړي دي.
د کچالو دغه زېرمتونونه د ۴۸ میلیونه او ۱۰ زره او ۹۲ افغانیو په لګښت د کرنې وزارت په ۸۰ سلنه او د برخمن شویو بزګرانو په ۲۰ سلنه ونډې جوړیږي.
دغه زېرمتونونه هر یوه د ۱۲ مټریک ټنه کچالو د زېرمه کولو وړتیا لري، چې ددې ولایت د بزګرانو د کچالو ساتنې لپاره غوره زمینه برابروي، په دغو ۷۸ زېرمتونونو کې د لوګر بزګران کولای شي، چې دکال څه باندې ۹۳۰ مټریک ټنه کچالو زېرمه کړي.
د کرنې، اوبولګولو او مالدارۍ وزارت د احصایې او معلوماتو ریاست د شمېرو له مخې تېرکال د لوګر په ۵۴۵ هکټاره ځمکه کې کچالو کرل شوې وه، چې د تولید کچه یې ۱۰ زره او ۹۰۰ ټنه وه.
