د بولان ځنګل تخریب شوي سیمې بیارغول کېږي
۲۸ مرغومې ۱۴۰۲ه.ش
۶ رَجَب المُرَجَّب ۱۴۴۵ ه.ق
د هلمند ولایت د کرنې، اوبولګولو او مالدارۍ ریاست له خوا په دې ولایت کې د بولان د طبیعي ځنګلونو هغه سیمې، چې تخریب شوي او یا له منځه تللي دي د بیا رغولو چارې پیل شوي دي.
د یادې رغونې په لړ کې د بولان د طبیعي ځنګونو نږدې ١٠٠ جریبه هغه ځمکه، چې په تېرو کلونو کې سوځېدلې او یا دبېلابېلو عواملو له لارې له منځه تللې دي بیا رغول کېږي.
ددې ترڅنګ د نوموړي ځنګل په داخل کې د هغو سیمو د هوارولو چارې پیل شوي دي، چې د ځنګل د بیا رغولو په پار په کې نیالګي اېښودل کېږي.
باید وویل شي، چې د هلمند په مرکز لښکرګاه کې د بولان طبیعي ځنګل یوازنۍ ځنګل دی، چې د سیمې د سمسورتیا او زرغونتیا، د هوا د ککړتیا د مخنیوي او ددې ولایت اوسیدونکو لپاره د تفریح په برخه کې ځانګړې ځای لري.
