تېر یوه کال کې د بادرنګو تولیدات زیات شوي دي

۲۲ چنګاښ ۱۴۰۰
د کرنې وزارت د چارواکو او فارم لرونکو د مالوماتو پر اساس، سږکال د بادرنګو تولیدات زیات شوي دي او ښه بازار هم لري.
د کرنې، اوبولګولو او مالدارۍ وزارت د شمېرو له مخې، د وروستي یوه کال په ترڅ کې د هېواد په کچه ۱۸۰ زره او ۸۶۱ مټریک ټنه بادرنګ تولید شوي دي.
د بادرنګو په تولید شوې شمېره کې، دواړه ډوله د ګلخونو بادرنګ (۵۴ زره او ۱۳۸ کیلوګرام) او په ازاد ډول کرل شوې (۱۲۶ زره او ۷۲۳ کیلوګرامه) بادرنګ شامل دي.
 په وروستیو څو کلونو کې دکرنې، اوبولګولو او مالدارۍ وزارت په ملاتړ د خصوصي سکټور له خوا د هېواد په کچه ډېر شنې خونې جوړ شوي دي، ددغو شنوخونو له ډې ډېری یې بادرنګ تولیدوي.
د یادو شنوخونو محصولات په کورنیو بازارونو کې د وېش ترڅنګ له هېواده بهر هم صادرېږي. د کرنې وزارت د شمېرو له مخې تېرکال افغانستان د شپږ میلیونه او ۶۸۴ زره او ۷۴۷ امریکایي ډالرو په ارزښت ۵۰ میلیونه او ۸۳۱ زره او ۳۴۲کیلوګرامه بادرنګ پاکستان، تاجکستان او عربي متحده اماراتو ته صادر کړي دي.
بادرنګ د هېواد په ۲۹ ولایتونو کې توليدېږي، خو فراه د ۹۲ زره او ۶۱۳ مټریک ټنو په تولید، هلمند د ۴۶ زره او ۴۰ مټریک ټنو او هرات د ۱۱ زره او ۶۵۷مټریک ټنو په تولید سره په ترتیب سره د هېواد په کچه د بادرنګو درې ستر تولیدوونکي ولایتونه دي.
سږني وچکالۍ ته په کتو بزګران په خلاصه فضا کې د کرکېلي له ډلې د بادرنګو د کرکېلي پرځای، چې ډېرې اوبو ته اړتیا لري، په شنوخونو کې د بادرنګو کرکېلي ته مخه کړه.
د فراه د کرنې رییس عبدالمنان متین وایي، چې د وچکالۍ له وجې ددې ولایت ډېری کروندګر په شنوخونو کې کرکېله کوي، په همدې موخه ددې ولایت د بادرنګو سږني تولیدات ۱۰ سلنه زیات شوي دي.
هغه وویل، چې بادرنګ په کورنیو بازارونو او بهر کې ښه بازار هم لري.
دکرنې وزارت د احصایې او مالوماتو ریاست د اطلاعاتو پر بنسټ په کورنیو بازارونو کې هر کیلو بادرنګ له ۱۹ تر ۳۶ افغانیو خرڅېږي.
دکابل په دشت برچې کې د بادرنګو یو فارم لرونکی ابراهیم یاوري وايي، سربېره پردې چې سږني پسرلني سړه هوا د ده د تولیداتو د ټیټوالي لامل شوی دی، خو د بادرنګو بازار څخه رضایت لري.
هغه وایي:«تېرکال مو د فارم محصول ښه و او په لوړه بیه خرڅېده، خو د پسرلي په پیل کې د سړې هوا له وجې سږکال مو د فارم محصول کم شوي دي. د تېرکال په پرتله زموږ د فارم په عوایدو کې کوم بدلون نه دی رامنځته شوي، ځکه تېرکال بیه ټیټه وه او سږکال محصول ټیټه ده.»
پاکستان ته د بادرنګو یو صادرکوونکی کربلایي غلام وایي، چې هغه د دشت برچې له شنوخونو راټول شوي، د ورځې نږدې ۳۱۵ مټریک ټنه بادرنګ پاکستان ته صادروي.