اروزګان کې د اوبو مدیریت په پار شپږ چکډمونه جوړېږي
۲۰ مرغومې ۱۴۰۲ه.ش
۲۸ جُمَادَى الثاني ۱۴۴۵ ه.ق
د کرنې، اوبولګولو او مالدارۍ وزارت له خوا د اروزګان ولایت په شپږو ولسوالیو کې د سېلابونو د مخنیوي، د ځمکې لاندې اوبو د پیاوړتیا، د خاورې د تخریب او د رسوبي موادو او اوبو د مدیریت په موخه شپږ چکډمونه جوړېږي.
د اروزګان دکرنې، اوبولګولو او مالدارۍ ریاست د چارواکو په خبره د کرنې وزارت د اوبولګولو او طبیعي سرچینو معینیت د استازو له خوا ددغو چکډمونو د جوړولو هوکړه لیکونه له اړوندو شرکتونو سره لاسلیک شول.
ټاکل شوې د دغو چکډمونو رغنیزې چارې په ډېر ژر پیل او زرګونه جریبه کرنیزه ځمکه به خړوبه کړي.
د يادو چکډمونو د رغنیزو چارو په پيل سره د اروزګان ولایت د شپږو ولسوالیو لسګونو اوسېدونکو ته د لنډې مودې لپاره د کار زمينه هم برابرېږي.
