لغمان کې د نیالګیو اېښودو کمپاین پیل شو

۸ سلواغه ۱۳۹۹
د لغمان دکرنې، اوبولګولو او مالدارۍ ریاست وایي، چې په دې ولایت کې د نیالګیو کېنولو کمپاین پیل شوی دی.
یاد کمپاین، چې د لغمان له پوهنتون څخه پیل شوی دی، په پیل غونډه کې یې د لغمان مرستیال والي شهزاده مظلومیار، د کرنې رییس محمدجمیل خوشحال او ددې ولایت یوشمېر نورو سیمه ییزو چارواکو ګډون درلود.
د لغمان د کرنې رییس محمد جمیل خوشحال وایي، چې د چاپېریال ساتنې ادارې، مهترلام ښاروالۍ او پوهنتون ریاستونو سره په همغږۍ د نیالګیو اېښود کمپاین په لاره اچول شوې ده، چې په ترڅ کې به یې سږکال د لغمان په ولایت کې لسګونه زره نیالګي کېنول شي.
د لغمان مرستیال والي شهزاده مظلوم یار د نیالګیو کېنول د هېواد سمسورتیا او ښېرازې په پار اړین وبلل او د لغمان ولایت له ولسونو وغوښتتل، په خپلو کورونو، بڼونو او باغچو کې دې نیالي کېنوي او د خپل چاپېریال په زرغونتیا او ابادولو کې دې خپل رول اداء کړئ.
د لغمان د کرنې ریاست ددې ولایت له خلکو غواړي، چې په دې کمپاین کې ونډه واخلي او د ونو او نیالګیو ساتنې او څارنې ته ځانګړې پاملرنه وکړي.