هلمند کې د ګازرو حاصلات ډېر شوي
۶ لیندۍ ۱۳۹۹
د هلمند ولایت د کرنې، اوبولګولو او مالدارۍ ریاست د معلوماتو له مخې، په دې وروستیو کې په یاد ولایت کې د ګازرو کرکېله او حاصلات ډېر شوي دي.
د هلمند د کرنې ریاست د ارزونې له مخې سږ کال په یو زرو ۹۰ هکتاره ځمکه کې ګازرې کرل شوي دي، چې سږني حاصل یې په منځینۍ ډول ۱۹ زره او ۸۰ متریک ټنو ته رسیږي؛ چې د تېرکال په پرتله د پام وړ زیاتوالی پکې راغلی دی.
د هلمند ولایت د کرنې ریاست د څېړنو له مخې د هلمند خاوره اوبه او هوا د ګازرو پالنې او روزنې ته مناسبه ده، نو په همدې موخه یې ګڼو کروندګرو کښت ته مخه کړې ده .
د هلمند د کرنې ریاست په پام کې لري، چې د ګازرو د کرکيلې په اړه له کروندګرو سره په همکارۍ یو لړ پراګرامونه پلي کړي تر څو په یاد ولایت کې د نورو سبو او مېوو تر څنګ د ګازرو کرکېله زیاته او د بزګرانو اقتصادي وضعیت په پښو ودریږي.
