د کرنې وزارت مرستیال اوزبیکستان ته د خپل رسمي سفر په درېیمه ورځ د تولیدي، پروسس او کرنیزو او مالدارۍ فارمونو څخه لیدنه وکړه
۲۰ لړم ۱۴۰۵ هـ.ش
۳۰ جُمَادَى الأول ۱۴۴۸ هـ.ق
د افغانستان اسلامي امارت د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني اوزبیکستان جمهوریت ته د خپل رسمي سفر په درېیمه ورځ، د مل پلاوي په ملتیا، د دغه هېواد د اندیجان ښار او د اندیجان ولایت د بوستان، الیتنکول، شهرخان او بالیقچي ولسوالیو له یو شمېر مهمو تولیدي، پروسس، کرنیزو او مالدارۍ مرکزونو څخه لیدنه وکړه.
د دغو لیدنو په ترڅ کې، پلاوي د بزګر بازار، د پنبې د پروسس فابریکې، د جرابو د تولید فابریکې، د شېدو د پروسس فابریکې، د مالدارۍ او چرګانو روزنې فارمونو، د چرګانو د محصولاتو د پروسس مرکز، د کبانو روزنې فارم او د دلمه مرچو له تولیدي شنوخونو څخه لیدنه وکړه.
د دغو لیدنو پر مهال د بازار د تنظیم او کرنیزو محصولاتو د مستقیمې عرضې، د خامو موادو د پروسس او وروستیو محصولاتو د تولید، د مالدارۍ او چرګانو روزنې فارمونو د معیاري مدیریت، د لبنیاتو د کیفیت ساتنې، د کبانو روزنې د پراختیا او په شنوخونو کې د تولیدي لارو چارو په اړه ارزونه وشوه.
همدارنګه، افغان پلاوي د یادو مرکزونو له مسؤولینو او متخصصینو سره د نوې ټکنالوژۍ د کارونې، د تولیدي ظرفیت لوړولو، د ارزښتزیاتونې، د پروسس کوونکو صنایعو د پراختیا، بازارموندنې او بازار ته د محصولاتو د منظمې عرضې ځنځیر د رامنځته کولو په اړه بحث او د نظرونو تبادله وکړه.
دغه لیدنې د کرنې، مالدارۍ، د محصولاتو د پروسس او اړوندو صنایعو په برخو کې د ازبیکستان جمهوریت له عملي تجربو سره د بلدتیا په موخه ترسره شوې، چې په ترڅ کې یې د یادو برخو د ظرفیتونو، معیاري تولیدي لارو چارو او پراختیايي میتودونو په اړه د لا زیاتو معلوماتو ترلاسه کولو زمینه برابره شوه.
په دغه سفر کې د مالدارۍ او حیواني روغتیا لوی رییس مفتي ذاکرالله ذاکر، د ترویج لوی ریاست تخنیکي سلاکار ډاکټر روحالله فضلي، د کرنې خونې مرستیال حاجي میرویس حاجيزاده او د افغانستان د کرنې او مالدارۍ خونې د اړیکو رییس حاجي امید حیدري هم د کرنې وزارت له مرستیال سره ملتیا کوي.
