د ننګرهار وادي کرنیز امارتي شرکت کې ۱۰۰ زدهکړیالانو ته د عملي زدهکړو زمینه برابره شوه
۲۰ وری ۱۴۰۵ه.ش
۲۲ شَوّالُ المُکَرَّم ۱۴۴۷ه.ق
د ننګرهار وادي کرنیز امارتي شرکت له لوري د مسلکي زدهکړو د پیاوړتیا په موخه، د ننګرهار د کرنې او وټرنرۍ تخنیکي او مسلکي انستیتیوت د ۱۳ ټولګیو شاوخوا ۱۰۰ تنه زدهکړیالانو ته د عملي زدهکړو زمینه برابره شوې ده.
یاد زدهکړیالان د شرکت په بېلابېلو فارمونو او بڼونو کې د کرنې، وترنرۍ، اقتصاد، انجینرۍ او نورو اړوندو څانګو په برخو کې عملي فعالیتونه ترسره کوي، څو خپلې مسلکي وړتیاوې لا پیاوړې کړي او له تیوري زدهکړو سره عملي تجربه هم ترلاسه کړي.
ددې لیدنې په ترڅ کې د مالدارۍ فارم عمومي آمر انجنیر شکرالله نورزي، د تغذیې مسؤل ډاکټر حضرت عمر او نورو تخنیکي مسؤلینو زدهکړیالانو ته د فارم د فعالیتونو، روانو چارو، د څارویو د ساتنې، تغذیې، روغتیايي خدمتونو او تولیدي پروګرامونو په اړه هر اړخیز معلومات وړاندې کړل.
زدهکړیالانو د فارم له بېلابېلو برخو څخه لیدنه وکړه او د څارویو د نسلونو پېژندنې، عصري مالدارۍ سیستمونو، تولیداتو او مسلکي کړنو په اړه عملي او علمي زدهکړې ترلاسه کړې.
د یادو زدهکړیالانو استادانو دا علمي او عملي پروګرام ګټور وباله او ویې ویل، چې عملي زدهکړې د تیوري درسونو تر څنګ د زدهکړیالانو مسلکي وړتیاوې لا پیاوړې کوي او هغوی د کار بازار ته ښه چمتو کوي.
په پای کې، زدهکړیالانو او استادانو د ننګرهار وادي کرنیز امارتي شرکت له مشرتابه څخه مننه وکړه، چې د عملي زدهکړو لپاره یې لازمې اسانتیاوې برابرې کړې دي.
