د ننګرهار په دوو ولسوالیو کې ۲۰۰ هېوادوالو ته د کار زمینه برابره شوه
۴ کب ۱۴۰۴ه.ش
۶ رَمَضانُ المُبارَک ۱۴۴۷ه.ق
د ننګرهار د کرنې، اوبو لګولو او مالدارۍ ریاست په هڅو او د بشري خیریه مؤسسې «اواچډبلیو» په مرسته د ننګرهار په مومندرې او لعلپورې ولسوالیو کې د کانالونو صفا کولو په برخه کې دسیمې ٢٠٠ تنو هېوادوالو ته د کار زمینه برابره شوه.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، چې د مومندرې ولسوالی کمي ډکي کانال او دلعلپورې ولسوالی سربند کانال کې ٢٠٠ تنو ته د شل ورځو لپاره د کار زمینه برابره شوه.
ښاغلي محمد زیاته کړه، چې د یادو کارګرانو په مرسته به په دواړو کانالونو کې څه باندې ۱۳ کیلو متره کانالونو صفایي ترسره شي، چې ددې سره به ٢۷٠٠ جریبه ځمکه خړوبه او په منظم دول ورته اوبه ورسېږي. د ننګرهار د کرنې رییس وایي د کانالونو پاکولو موخه د اوبو ښه مدیریت او ضایعاتو مخنیوي دي.
د بشري خیریه مؤسسې د کرنې برخې مسؤل انجنیر هدایت الله ثنایي وویل، چې په راتلوونکي کې په یادو ولسوالیو کې د بزګرانو سره د اصلاح شوي تخمونو، تخنیکي روزنو، نغدي مرستو او نورو بېلابېلو برخو کې هم مرستي ترسره کوي.
