هرات کې راستانه شویو کډوالو کورنیو ته د غنمو او نغدي مرستو د وېش بهیر پیل شو
۱۴ سلواغه ۱۴۰۴ه.ش
۱۵ شَعبان المُعَظّم ۱۴۴۷ه.ق
د عاليقدر امیرالمؤمنین حفظهالله د فرمان پر بنسټ، په هرات ولایت کې د نویو راستانه شویو کډوالو کورنیو لپاره د غنمو او نغدي مرستو د وېش بهیر د کرنې، اوبو لګولو او مالدارۍ وزیر مولوي عطاءالله عمري له لوري، د سیمهییزو چارواکو او یو شمېر راستنو شویو کډوالو په حضور کې په رسمي ډول پیل شو.
د یاد بهیر د پیل پر مهال دکرنې، اوبولګولو او مالدارۍ وزیر مولوي عطاءالله عمري وویل، دا پروګرام د راستنېدونکو کډوالو د ملاتړ لپاره د حکومت د منظم او هدفمند اقدامونو یوه برخه ده او د اسلامي امارت د رهبرۍ جدي اراده څرګندوي، څو د کډوالو بېړنیو او اساسي ستونزو ته رسېدنه وشي. نوموړي زیاته کړه، د اسلامي امارت رهبرۍ د راستنو شویو کورنیو د ستونزمن وضعیت په درک کولو سره لارښوونه کړې ده، چې خوراکي او نغدي مرستې په شفاف او عادلانه ډول مستحقو کسانو ته ووېشل شي، تر څو هغوی وکولای شي په اوسنیو شرایطو کې خپل ژوند بېرته سمبال کړي.
د کرنې وزیر همدارنګه ټینګار وکړ چې د یادو مرستو وېش یوازې په یوه ولایت پورې محدود نه دی، بلکې په ټول هېواد کې روان دی او دا مهال په ۱۲ ولایتونو کې په هممهاله توګه عملي کېږي.
په همدې حال کې، د هرات والي شیخ مولانا اسلامجار د دې ولایت د خلکو یووالي ته په اشارې وویل، د هرات اوسېدونکو د ورورولۍ په فضا کې د کډوالو هرکلی کړی او یو شمېر کسانو د شخصي وسایطو له لارې د کورنیو په لېږد کې همکاري کړې ده، او ځینو کورنیو په خپله خوښه د خپلو کورونو یوه برخه کډوالو ته سپارلې ده. نوموړي زیاته کړه، چې د اسلامي امارت د رهبرۍ د فرمان له مخې، په ټول هېواد کې د کډوالو د دایمي مېشتېدو لپاره د استوګنیزو ښارګوټو د جوړولو چارې پیل شوې دي او د ژمي په سړو شرایطو کې د مستحقو کورنیو لپاره د غنمو او نغدي پیسو د وېش بهیر په منظم ډول روان دی.
له بلې خوا، د هرات ولایت مستوفي مفتي کفایتالله حقاني وویل، هرې کډوالې کورنۍ ته پنځه زره افغانۍ نغدي او ۲۵۰ کیلوګرامه غنم وېشل کېږي. د نوموړي په وینا، د نغدي مرستو ټولیزه اندازه شپږ میلیونه افغانیو ته رسېږي او د وېش بهیر د ګومارل شوو پلاوو تر څارنې لاندې او په بشپړ شفافیت سره ترسره کېږي، تر څو مرستې واقعي مستحقینو ته ورسېږي.
یو شمېر راستانه شویو کډوالو هم د دې اقدام مننه وکړه او ویې ویل، چې دغه مرستې د هغوی د معیشتي وضعیت په ښه کېدو کې مهم رول لري او د دوی د ځینو بېړنیو ستونزو د کمولو لامل ګرځي.
د پلان له مخې، په هرات ولایت کې د کډوالو کورنیو لپاره د دغو مرستو د وېش بهیر به د درېیو ورځو لپاره دوام ولري.
یادې مرستې د اسلامي امارت د حمایوي پروګرامونو په چوکاټ کې او د کډوالو د بېړنیو اړتیاوو د پوره کولو په موخه وېشل کېږي.
