ننګرهار کې د بڼوالۍ څلور ورځنۍ روزنیز پروګرام پیل شو

۱۷ لېندۍ ۱۳۹۸
د ننګرهار د کرنې، اوبولګولو او مالدارۍ ریاست د کرنې وزارت د بڼوالۍ او مالدارۍ ملي پروژې(NHLP)په همکارۍ د ختیځو ولایتونو د کرنې ریاستونو د ترویج استازو او د بڼوالۍ او مالدارۍ پروژې د بڼوالۍ د برخې ۵۰ کارکوونکو ته چې ۱۱ یې انجونې دي د بڼوالۍ په برخه کې څلور ورځني روزنیز پروګرام پیل کړ.
د یاد روزنیز پروګرام په پرانیست غونډه کې د ننګرهار د کرنې چارسمبال مشر ډاکټر محمدضمیر بهسودي وویل، چې د بڼوالۍ د هر اړخیزو ستونزو د معلومولو او شته ستونزو ته حل د لارې پیدا کولو په موخه ورته ټرننګونه ګټور دي.
په ورته وخت کې د بڼوالۍ او مالدارۍ ملي پروژې (NHLP) د ختیځ زون مسول انجنیر رحمت ګل سیرت د خپلو خبرو په ترڅ کې وویل، چې یاد روزنیز پروګرام د بڼوالۍ په برخه کې د کارکوونکو د وړتیا لوړول او په دغه برخه کې د هر اړخیزو ستونزو د حل په موخه جوړه شوې ده.
ښاغلي سیرت وویل، چې ددې روزنیز پروګرام په لړ کې به ګډونوالو ته د «اوبو تنظیم، د نباتي هورمونونو پېژندنه، د ژمني ناروغیو او افتونو کنټرول او ډېران جوړولو» په برخه کې هر اړخیز معلومات ورکړل شي.
د ننګرهار د کرنې ریاست تل هلې ځلې کوي، چې په روزنیزو برنامو سره د بڼوالو وړتیاوې لوړې او اقتصادي پرمختګ ته یې زمینه برابره کړي.