خانشین ولسوالی ته د هلمند دکرنې رییس سفر
۲۸ مرغومې ۱۴۰۲ه.ش
۶ رَجَب المُرَجَّب ۱۴۴۵ ه.ق
دهلمند ولایت د کرنې، اوبولګولو او مالدارۍ رییس الحاج مولوي نیازمحمد وهاج په داسې حال کې چې د ځمکو د تنظیم آمر مولوي زین الله زاهد یې هم ملتیا کوله ددې ولایت خانشین ولسوالی ته سفر وکړ .
د یاد سفر موخه په دې ولسوالی کې د ځنګلونو او مالچرونو د ښې ساتنې او له غصب څخه یې د مخنیوی، د امارتي ځمکو د اجارو راټولولو پر کړنلارې، د امارتي ځمکو د غصب مخنیوی او له یادو ځمکو څخه د سالمې ګټې اخستنې په اړه د مسؤلینو سره د همغږۍ ناسته او عامه پوهاوی وه.
د هلمند دکرنې رییس د خانیشین ولسوال الحاج مولوی بریالي او د کرنې له مسؤلینو سره وکتل او د امارتي ملکیتونو پر ساتنې، د کرنیزو برنامو د تطبیق او په دې برخه کې د شته ستونزو او وړاندیزونو په اړه یو له بل سره لازمې سلاء مشورې شریکې کړې.
د یادې لیدنې په ترڅ کې د اړونده ولسوالی د مسؤلینو لخوا په بېلابېلو برخو کې کرنې رییس ته معلومات وړاندې شول او د کرنې ریاست سره د چارو په سرته رسولو او همغږي کولو کې د بشپړې همکارۍ ډاډ ورکړل.
