د هلمند په ګرشک ولسوالۍ کې بې کیفیته حیواني او نباتي درمل له منځه یوړل شول
۱۵ زمری ۱۴۰۱ه.ش
۸ محرم الحرام ۱۴۴۴ ه.ق
دهلمند ولایت د کرنې، اوبولګولو او مالدارۍ ریاست لخوا په ګرشک ولسوالۍ کې له ګڼو حیواني او نباتي درمل پلورنځیو څخه لیدنې او ارزونې ترسره شوي دي.
ددې پروسې په ترکیب کې د ولسوالۍ، امنې قومندانۍ، روغتیا ریاست او کرنې ادارې چارواکو د هیئت په ډول شامل دي، چې د بې کیفیته تاریخ تېر او تقلبي درملو په نښه کولو او له منځه وړلو برخو کې لازم اقدامات ترسره کوي.
په همدې موخه د نوموړي پلاوي لخوا دګرشک ولسوالۍ په بازار کې له ګڼو درمل پلورنځیو څخه راټول شوی تاریخ تېر او بې کیفیته او تقلبي حيواني او نباتي درمل له منځه یوړل شول .
ددې څارنې او کنټرول موخه د بې کیفیته او تاریخ تېرو درملو د پلور مخنیوي، په خپل سر د هټیو پرانیستل، او د غیر قانوني درملو د واردولو مخنیوی دی.
