هلمند کې سږکال ۳۲۰۰ مټریک ټنه اصلاح شوي تخمونه تولیدیږي

۱۲ وری ۱۳۹۹
د هلمند دکرنې، اوبولګولو او مالدارۍ ریاست وایي، چې په دې ولایت کې د غنمو او نخودو د اصلاح شوي تخمونو د تولید په پار په ۶۳۰ هکټاره ځمکه کې د غنمو او نخودو تخمونه کرل شوي دي.
د هلمند دکرنې رییس زلمی الکو وایي، چې ددې ولایت په څېړنیز فارم، د اصلاح شویو تخمونو د تولید تصدۍ او د اصلاح شویو تخمونو تولیدي شرکتونه ددې ولایت په ۶۳۰ هکټاره ځمکه کې د غنمو او نخودو بېلابېل ډولونه (ورایټۍ) په درېوو کلاسونو کې کرلي دي، چې له دغو کروندو څخه به د غنمو او نخودو درې زره او ۲۰۰ مټریک ټنه اصلاح شوي تخمونه تولید شي.
په هلمند کې دغنمو او نخودو اصلاح شوي تخمونه د ځمکوالو، بزګرانو او شرکتونو په واک کې ورکول کیږي.
د هلمند دکرنې ریاست د تخمونو د اصلاح، ترویج او تکثیر په برخه کې کار کوي ترڅو له همدې لارې بزګرو ته سالم او د ښه کیفیت لرونکي تخمونه ورسوي، چې له مخې به یې په حاصلاتو کې د پام وړ زیاتوالی راشي.