خوست کې یوشمېر بزګرانو ته د سویابینو کرکیلې په اړه روزنه ورکړل شوه

۲۶ غویی ۱۴۰۵ه‍.ش
۲۹ ذُو ٱلْقَعْدَةِ ۱۴۴۷ه‍.ق
د خوست ولایت کرنې، اوبو لګولو او مالدارۍ ریاست تر چتر لاندې، د اسماعیل خیلو او مندوزیو ولسوالی د کرنیزو چارو مدیریت په همغږۍ او د «اوآرډي» مؤسسې په همکارۍ، د یادې ولسوالی بزګرانو ته د سویابینو د کرکېلې په اړه یو ورځنی روزنیز سیمینار وړاندې شو.
په دغه سیمینار کې بزګرانو ته د سویابینو د کرکېلې مهم تخنیکونه، د تخم د کرلو مناسب وخت، د ځمکې چمتو کول، د سرې استعمال، او د حاصلاتو د ښه والي لارې چارې په عملي او نظري ډول تشریح شول.
د یادونې وړ ده، چې له دې وړاندې هم د همدې پروګرام په ترڅ کې یادو بزګرانو ته د سویابینو اصلاح شوي تخمونه او کیمیاوي سرې وېشل شوې وې، څو د هغوی حاصلات لوړ او کرنیز عواید یې زیات شي.
د خوست ولایت کرنې، اوبو لګولو او مالدارۍ ریاست ژمن دی، چې د کروندګرو د ظرفیت لوړولو او د عصري کرنې د ترویج په موخه به ورته پروګرامونه دوامداره وساتي.