د ننګرهار بټي کوټ کې د بر چهاردي کانال د پاک کارۍ چارې بشپړې شوې
۲۴ غویی ۱۴۰۵ه.ش
۲۷ ذُو ٱلْقَعْدَةِ ۱۴۴۷ه.ق
د ننګرهار د کرنې، اوبو لګولو او مالدارۍ ریاست په همغږۍ، د افغانستان د کلیود بیا ودانولو مؤسسې په تخنیکي همکارۍ او د «کورډیډ» په مالي ملاتړ، د بټي کوټ ولسوالی د بر چهاردي کانال د پاک کارۍ چارې بشپړې شوې.
یاد کانال اته کیلومتره اوږدوالی لري، چې د پاک کارۍ له بشپړېدو سره سم د سیمې کرنیزو ځمکو ته د اوبو رسولو بهیر منظم شوی او د اوبو ضایعات کم شوي دي. همداراز، په دې پروژه کې ګمارل شویو کاریګرو ته د کار په بدل کې نغدې پیسې هم ورکړل شوې.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، چې په یاده پروژه کې ۵۷ تنو ته د کار زمینه برابره شوې وه، چې هر کاریګر ته د شلو ورځو کار په بدل کې ۶۰۰۰ افغانۍ ورکړل شوې دي.
نوموړي زیاته کړه، د بر چهاردي کانال د پاک کارۍ له امله اوس مهال ۱۳۰۰ جریبه کرنیزې ځمکې ته اوبه په منظم ډول رسېږي، چې دا چاره به د حاصلاتو په زیاتوالي او د بزګرانو د ستونزو په کمېدو کې مهم رول ولري.
د افغانستان د کلیود بیا ودانولو مؤسسې د ختیځ زون مسؤل حاجي فضل الرحمن توریالي وویل، د کانالونو د پاک کارۍ اساسي موخه د اوبو ښه مدیریت، د اوبو د ضایعاتو مخنیوی، خلکو ته د کار زمینې برابرول او د خوړو خوندیتوب رامنځته کول دي، څو کورنۍ پر ځان بسیا شي.
د یادونې وړ ده، چې تر دې وړاندې هم دغې مؤسسې د ننګرهار ولایت په بېلابېلو ولسوالیو کې د اوبو د مدیریت د ښه والي لپاره د کانالونو د پاک کارۍ ګڼې پروژې عملي کړې دي.
