ننګرهار کې ۲۰۰زره وړو شخوند وهونکو څارویو ته د طاعون واکسین تطبیق شو

۱۳ وری ۱۴۰۴ ه‍.ش
۴ شَوّالُ المُکَرَّم ۱۴۴۶ه‍.ق
د ننګرهار کرنې، اوبو لګولو او مالدارۍ ریاست په همغږۍ د ملګرو ملتونو د کرنې او خوراک ادارې له لوري ۲۰۰زره وړو شخوند وهونکو څارویو ته د طاعون واکسین تطبیق شو.  
د ننګرهار کرنې، اوبو لګولو او مالدارۍ رئیس مولوي محمد ولي محسن وايي، دغه واکسینونه د ولایت په ۱۵ ولسوالیو کې د کوچي او نورو مالدارانو څارویو ته تطبیق شوي، چې موخه یې د ناروغیو مخنیوی او د څارویو ساتنه ده.  
نوموړي یاد واکسینونه د مالدارۍ سکتور د پیاوړتیا لپاره مهم وبلل او وترنر داکترانو ته یې سپارښتنه وکړه، چې د ناروغیو د پېښېدو په صورت کې کرنې ریاست ته خبر ورکړي او اړین تدابیر ونیسي.  
مولوي محسن زیاته کړه، چې د مالدارۍ سکتور د ودې لپاره بېلابېل خدمات وړاندې کېږي او د طاعون ضد واکسین تطبیق یې یوه کوچنۍ بېلګه ده. نوموړي وویل، چې دا پروګرام نه یوازې د څارویو روغتیا ته ګټه لري، بلکې د مالدارانو اقتصاد هم پیاوړی کوي.