د بغلان ولایت د کرنې ریاست مسؤلینو د پوزه ایشان کرنیز څېړنیز فارم څخه لیدنه وکړه
۱۲ مرغومې ۱۴۰۳ه.ش
۱ رَجَب المُرَجَّب ۱۴۴۶ه.ق
د بغلان ولایت د کرنې، اوبو لګولو او مالدارۍ ریاست مسؤلینو د پوزه ایشان کرنیز څېړنیز فارم د فعالیتونو ارزونه وکړه.
په دغه فارم کې د کرنیزو څېړنو مدیریت مسلکي کارمندانو د غنمو او اوربشو د مورنيو او هستوي تخمونو کښت ترسره کړی، چې د کرنې او روزنې ټول مراحل به یې د مسلکي ټیم له لوري ترسره کېږي.
د کرنې، اوبو لګولو او مالدارۍ ریاست رییس الحاج مولوي رحیم الله "احدي" او د کرنیزو چارو آمر الحاج مولوي نعمت الله نوري د یاد فارم څخه لیدنه وکړه او د کرنیزو فعالیتونو د پرمختګ لپاره یې د مدیریت کړنې وستایلې.
د یاد فارم فعالیتونه د بغلان ولایت کرنیزو چارو د پرمختګ لپاره مهم بلل کېږي، چې د لوړ حاصل لرونکو تخمونو تولید او وده یې اساسي موخه ده.
