ننګرهار کې د تازه مېوو یو ورځنی نندارتون دائر شو

۵ چنګاښ ۱۴۰۳ه‍.ش
۱۸ ذی‌الحِجّة ۱۴۴۵ه‍.ق
د ننګرهار د کرنې، اوبولګولو او مالدارۍ رياست له لوري د دغه ولايت د اوړي موسم د تازه مېوو يو ورځنی نندارتون ددې ولایت د مقام په انګړ کې دائر شو.
د ياد نندارتون پر مهال د ننګرهار والي ملا محمد نعيم اخند، د ولایت مرستيال مولوي سعيد احمد بنوري، دفتر رییس مولوي شاهد نوراني، د کرنې وزارت د څېړنو لوی رییس مولوي نصرت الله طلحه، دننګرهار د کرنې رییس مولوي محمد ولي محسن او د يو شمېر نورو ادارو مسئولینو او استازو حضور درلود.
د ننګرهار مرستيال والي مولوي سعيد احمد بنوري وويل، چې له دې نندارتون څخه موخه هېوادوالو ته د خپلو مېوو په اړه د معلوماتو ورکول او ورته پيغام رسول دي، ترڅو په مناسبو سيمو کې د دې مېوو بڼونه جوړ او پرمټ يې حلال رزق ترلاسه کړي.
ښاغلی بنوري وويل: «موږ خپلو اړوندو ادارو سره په ګډه کار کوو ترڅو په ولسواليو کې کرنې، بڼوالۍ او مالدارۍ سکتور ته پراختيا ورکړو او په دې سره ځان بساينې ته نږدې شو.»
د ننګرهار مرستیال ولي وویل، چې ددې ولایت بزګرانو او مالدارانو ته به ځانګړې پاملرنه کوي.
 په همدې حال کې د کرنې، اوبو لګولو او مالدارۍ وزارت د څېړنو لوی رییس مولوي طلحه وويل، چې هڅه کوي په دې ولايت کې د خرما او ستروسو بېلابېلو ډولونو بڼونه جوړ کړي همدا راز به بزګرانو او بڼوالو ته د ښه حاصل او بازار موندنې په برخه کې لازمې اسانتياوې رامنځته کړي.
د ننګرهار د کرنې رییس مولوي محمد ولي محسن وويل، چې په ننني نندارتون کې د اوړي موسم د هغو مېوو بېلابېل ډولونه نندارې ته اېښودل شوي، چې تازه رسيدلي دي. نوموړي زياته کړه، چې په دې مېوو کې شپږ ډوله الوچې، دوه ډوله انګور او يو ډول انځر شامل دي.
هغه د الوچو د ډولونو نومونه پرچون، کتلينا، فضل مناني، تاشقر غاني، لال خون او زرد، د انځر نوعه تاشقر غاني او د انګورو ډولونه فليم سيډليس او بليک امريلډ ياد کړل.
د يادونې ده، چې د ننګرهار د کرنې رياست د بڼوالۍ پراختيايي مرکز اړوند  فارم جديد کې اووه ملي کليکسيونونونه او اووه ننداریز بڼونه دي، چې په کې د انار ۷۹، ستروسو ۷۶، املکو ۲۴، زيتون ۱۰، خرما ۶، لوکاټ ۱۲، انځر ۱۶، شفتالو ۸، زردالو ۸، الوچه ۸، انګور ۲، ناک ۱، زردالو ۷، ستروس تجربوي ۹ او یو تنه انار ۳ چې جمله ۲۵۱ نوعې کيږي تر څېړنې لاندې دي.
بايد وويل شي، چې ننګرهار ولايت د سړې، معتدلې او ګرمې ابُ هوا لرونکی ولایت دی، چې له نېکه مرغه په کې لسګونه ډوله مېوې او سابه کرل کېږي.