خوست کې د نیالګیو کښېنولو کمپاین پیل شو
۱۰ کب ۱۴۰۲ه.ش
۱۸ شَعبان المُعَظّم ۱۴۴۵ه.ق
د خوست دکرنې، اوبولګولو او مالدارۍ ریاست وایي، چې په دې ولایت کې د «وچکالۍ سره د مبارزې په پار د نیالګیو کښېنول» تر شعار لاندې د پسرلي موسم د نیالګیو کښېنولو کمپاین د خوست مرستیال والي مولوي محبوب شاه قانت، دکرنې رییس محمد زمان عمري، د قومونو او قبایلو چارو رییس شیخ الحدیث مولوی کلیم الرحمن فاني، دکرنې وزارت د ځنګلونو د تنظیم رییس امان الله امانیار، د څړځایونو د تنظیم رییس سید احمد خالد، د خوست ولایت د امربالمعروف او نهي عن المنکر مرستیال مولوی معلم جان مدقق، د کار او ټولنیزو چارو رییس مولوی میرصاحب جان، د خوست ښاروال قاري بسم الله، د ټولګټو چارو رییس مولوي محمد الله، د قضاء امارت آمر مولوي محمد افسر، مستوفیت معاون مفتي نور الله، د لومړی حوزې آمر مولوي محمد روف، د اسمعیل خیلو او مندوزیو ولسوال بهرام جان او یوشمېر نورو سیمه ییزو چارواکو، مشرانو او ځوانانو په شتون کې رسماً پیل شو.
په دې اړه جوړه شوې غونډه کې د خوست دکرنې رییس محمد زمان عمري د خوست دکرنې ریاست پر عمده فعالیتونو خبرې وکړې او ویې ویل:«موږ د ۱۴۰۳ کال لپاره امکاناتو ته په کتو به لازم فعالیتونه ترسره کړو چې د خوست ولایت په بېلا بېلو سیمو کې به زرګونه مثمر او غیر مثمر نیالګي کښېنول شي.»
د خوست دکرنې رییس له خوست مېشتو وغوښتل، چې په دې کمپاین کې ونډه واخلي او د خپل هېواد په زرغونتیا کې خپله ایماني او انساني وجیبه ترسره کړي.
په دې غونډه کې دغه راز د قومونو او قبایلو چارو رییس شیخ الحدیث مولوي کلیم الرحمن فاني د نیالګیو کښېنولو په ارزښت هر اړخیزه وینا ترسره کړه. دغه راز دکرنې وزارت د ځنګلونو د تنظیم رییس امان الله امانیار د ځنګلونو ساتنې او بیارغونې او د څړ ځایونو د تنظیم رییس سید احمد خالد د طبیعي سرچینو اهمیت او ساتنې په اړه د غونډې ګډون والو ته اړین معلومات وړاندې کړل.
په همدې حال د خوست مرستیال والي د خوست دکرنې ریاست کړنې وستیال او له ټولو هېوادولو څخه یې و غوښتل، چې د نیالګیو کېنولو په دې کمپاین کې دې برخه واخلي او یو نیالګی د ځان او د ګران افغانستان لپاره کېوني، ترڅو په راتلونکې کې سمسور، زرغون او ښایسته افغانستان ولرو.
د خوست مرستیال والي له خلکو او بزګرانو وغوښتل، چې دکرنې او مالدارۍ په برخه کې دې نه ستړې کېدونکي هلې ځلې وکړي، ترڅو هېواد ځان بسیاینې ته نږدې شي.
