د هلمند دکرنې رییس دکرنې وزارت له پلاوي سره وکتل
٢۳ تله ۱۴۰۲ه.ش
۱ ربیعالاول ۱۴۴۵ ه.ق
د هلمند د کرنې، اوبولګولو او مالدارۍ رییس الحاج مولوي نظرمحمد صدیقي د کرنې، اوبولګولو او مالدارۍ وزارت څخه له راغلي پلاوي سره وکتل .
یاد پلاوی چې په ترکیب کې یې د کرنې وزارت د کنترول عمومي مسؤل، دداخلي پلټنې او کرنیزو زېربناو استازي شامل دې هلمند ولایت ته د خپل سفر په اړه کرنې رییس سره معلومات شریک کړل.
نوموړي پلاوي وویل:« د ا.ا.ا د کابینې د ٣ بند (١٨)٢٥/ ٥/ ١٤٤٤ ګڼې مصوبې د تحقق په منظور د هلمند ولایت د کرنې ریاست په برخه کې هغو شرکتونو چې په تیر نظام کې پروژې تطبیق او او یاهم نیمه تطبیق کړي وي خو د هغوی د کار، تضمین او تامیناتو پیسې نه وي اجرا شوې د اسنادو او سوابقو ارزونه یې کوو او بیا یې په اړه د اجرا په موخه عالي مقاماتو ته راپور وړاندې کوو»
د هلمند د کرنې الحاج مولوي نظرمحمد صدیقي راغلي پلاوي ته هر کلی ووایه او زیاته یې کړه :
«څرنګه چې د ا.ا.ا اسلامي نظام په ډیرو سختو قربانیو او تکالیفو راغلی دی نو د خپل وظیفوي مکلفیت له مخې هڅه کوو چې د نظام ملي بودیجه ، شتمني او عایداتو په تحفظ او د بیت المال په ښه ساتنه او پالنه کې خپلې هڅې لا ګړندۍ کړو»
هغه وویل تاسو چې د تېر وخت دپراختیايي پروژو د ارزونې مسؤلیت لرئ ، نو په ډېر دقت سره به د یادو چارو دقیقه پلټنه کوئ، تر څو د خیالي پروژو او یاهم دې ته ورته د نورو غیر اصولي کړنو په اړه یو روڼ او په حقیقت ولاړ راپور تر عالي مقاماتو پورې ورسول شي، هغه همدارنګه وویل چې موږ د اشخاصو او افرادو د واقعي حقوقو په اجرا خوښ یو خو د نظام له ملي بودیجې څخه په غیر شرعي او غیر اصولي ډول د سوء استفادې په کلکه څارنه کوو.
