د ننګرهارکانال شرکت: د درېيو فارمونو په ۸۱۹۴ جریبه ځمکې جوار کرل شوي
۲۲ وږي ۱۴۰۲ه.ش
۲۷ صَفَرُ المُظَفَّر ۱۴۴۵ه.ق
د ننګرهارکانال شرکت چارواکي وایي، چې ددې شرکت اړوند د درېيو فارمونو په ۸۱۹۴ جریبه ځمکې کې جوار کرل شوي دي، سږنۍ حاصلات به یې زرګونو ټنه ته ورسېږي.
د چارواکو په خبره د جوارو دغه فصل د کانال په درېيو فارمونو (۲،۳،۴) کې اجاره لرونکو له خوا کرل شوي دي.
ددغو فارمونو د امرینو په وینا چې له یوه جریب څخه به دغه اجاره لرونکي ترکابو سل منو جوارو پورې حاصلات راټول کړي.
بل پلو د ویلو ده، چې د اصلاح شویو تخمونو د تولید په موخه ننګرهارکانال شرکت د هلال هډه وال شرکت سره یو تړون لاسلیک کړی دی، چې له مخې يې یاد شرکت په کابو زر جریبه ځمکې د جوارو اصلاح شوي تخمونه کري دي.
په ننګرهارکې د هلال هډه وال شرکت یو تن مسوول ډاکتر عبدالغفارلودین وویل، چې سږ کال به د اټکل له مخې د جوارو د اصلاح شویو تخمونو حاصلات نږدې دوه سوه میټریک ټنو ته لوړ کړي، او بازار ته به د هایبرید ورایټۍ ښه حاصل وړاندې کړي.
