پکتیکا کې پر ۱۰۰۰ بېوزله کورنیو د هګیو چرګانو د وېش لړۍ بشپړ شو
![پکتیکا کې پر ۱۰۰۰ بېوزله کورنیو د هګیو چرګانو د وېش لړۍ بشپړ شو](https://www.mail.gov.af/sites/default/files/2019-12/79599660_2926641344027113_8122737623023222784_n.jpg)
۳ مرغومی ۱۳۹۸
د کرنې، اوبولګولو او مالدارۍ وزارت؛ د بڼوالۍ او مالدارۍ ملي پروژې «NHLP» له خوا د بېوزله کورنیو د ملاتړ په لړ کې داځل د پکتیکا ولایت مرکز ښرنه او ددې ولایت په ارګون، یحی خېلو او یوسف خېلو ولسوالیو کې ۱۰۰۰ بېوزله کورنیو لپاره د هګیو چرګانو ۳۰ قطعه یې فارمونه جوړ شول.
د پکتیکا د کرنې، اوبولګولو او مالدارۍ ریاست چارواکي وایي، چې پر دغو ۱۰۰۰ بېوزله کورنیو ۳۰ زره قطعې د هګیوچرګان، د چرګانو خوراکي توکي، واکسینونه، درمل او نور اړین توکي وېشل شوي دي. د دوی په خبره، د پکتیکا په مرکز ښرنه او ددې ولایت په ارګون، یحی خېلو او یوسف خېلو ولسوالیو کې د ۱۰۰۰ بېوزله کورنیو هرې کورنۍ ته ۳۰ د هګیو چرګان، د چرګانو خوراکي توکي، چرګانو لپاره د خوراکي توکو لوښې، د چرګانو درې ځلې واکسین او اړین در ملو ترڅنګ د چرګانو د ساتنې او پالنې په پارد روزونکو له خوا لازمې روزنې هم ورکړل شوي دي.
د پکتیکا د کرنې ریاست چارواکي زیاته کړه، چې له دې برنامې څخه برخمن شوي کورنیو لپاره د چرګانو د روزنې په برخه کې روزنیز پروګرامونه هم په پآم کې نیول شوي دي.
دغه پروژه د بېوزلو کورنیو د خوړو خوندیتوب، اقتصادي ودې او ملاتړ په موخه پلي شوی دی.
ددې پروژې موخه په پکتیکا ولایت کې د چرګانو روزنې صنعت ته پراختیا ورکول، په کور دننه مېرمنو ته د کار زمینه برابرول، د کورنیو د خوړو خوندیتوب او له دې لارې د بېوزله کورنیو اقتصادي پیاوړ تیا ده.