۱۳۹۹یم مالي کال کې د کندهار د کرنې ریاست لاسته راوړنې
۱۳مرغومې ۱۳۹۹
دکندهار د کرنې، اوبولګولو او مالدارۍ ریاست وایي، چې د ۱۳۹۹یم مالي کال په ترڅ کې یې ددې ولایت د بزګرانو، بڼوالو و مالدارانو د ملاتړ په پار دیاد ولایت په مرکز او ولسوالیو کې یوشمېر اغېزناکې پروژې پلي کړي دي.
د کندهار د کرنې، اوبولګولو او مالدارۍ رییس سیدحفیظ الله سیدي وایي، چې ۱۳۹۹یم مالي کال ددې ولایت د کرنې ریاست پراختیایي بودیجه ۴۹۷میلیونه او ۷۲۰زره او ۵۴۴ افغانۍ وه، چې له دې ډلې څه باندې ۹۰ سلنه یې د کرنې، بڼوالۍ، اوبولګولو، مالدارۍ او طبیعي سرچینو د پراختیا په پار لګول شوی دی.
د ښاغلي سیدي په خبره په دې ولایت کې د زعفرانو د ودې په پار د زعفرانو ننداریزې قطعې جوړول، د بېلابېلو کرنیزو توکو د عصري کرکېلي د ترویج په پار ننداریزې کروندې جوړول، پر بزګرانو د اصلاح شویو تخمونو او کیمیاوي سرو وېش، د نباتي ناروغیو کنټرول، د اوبو زېرمه کولو کچني بندونه جوړول، د حیواني خوراکي ورکړه، بېوزلو سره نغدې مرستې او د ناروغیو او افتونو د مخنیوي په پار له بزګرانو سره دوامداره همکارۍ هغه کړنې دي، چې ۹۹یم مالي کال کې ترسره شوي دي.
د کندهار د کرنې ریاست چارواکي وایي، چې د بڼوالۍ په برخه کې هم سږکال په دې ولایت کې یوشمېر کړنې ترسره شوي دي، چې په کې د نویو بڼونو جوړول، د یوشمېر بڼونو بیارغول او د بڼوالۍ په بېلابېلو برخو کې یوشمېر بڼوالو ته روزنه ورکول شامل دي.
ددې ترڅنګ په دې ولایت کې د کرنیزو محصولاتو مدیریت یوزرو ۱۲ پروژې هم پلي شوي دي، چې په کې د ممیزخونو او زېرمتونونو جوړول شامل دي.
په ورته وخت کې د کندهار د کرنې او مالدارۍ ریاست ددې ولایت د مالدارۍ د پراختیا په پار هم ۹۹یم مالي کال کې هلې ځلې کړي دي. دکندهار د کرنې رییس سیدحفیظ الله سیدي وایي، چې د کانګو تبي د مخنیوي په پار پراخ کمپاینونه پلي کول، د بروسلوز او یوشمېر نورو ناروغیو پر وړاندې د واکسینو کمپاینونه پلي کول، د مالدارنو د څارویو خوندي کولو په پار پر یوشمېر مالدارانو د څآرویو د ناروغیو درمل وېشل او مالدارانو ته روزنه ورکول هغه کړنې ديو چې د مالدارۍ په برخه کې ترسره شوي دي.
د دغه ریاست د ترسره شویو پراختیایي پراګرامونو څخه زرګونه نارینه او ښځینه کروندګر او مالداران برخمنې شوي دي، چې پدې سره په یاد ولایت کې کرنیز سکتور ورځ تر بلې د پراختیا په حال کې دی.
