خوست کې د سبو او مېوو د وچولو مرکزونو د جوړولو لپاره سروې ترسره شوه
۱۳ لیندۍ ۱۴۰۴ هـ.ش
۱۳ جُمَادَى الثاني ۱۴۴۷ هـ.ق
د خوست ولایت د کرنې، اوبو لګولو او مالدارۍ ریاست د کرنیزو چارو عمومي مدیریت تر څارنې لاندې، د افغان پرمختیایي مؤسسې د کارکوونکو له لوري او د ملګرو ملتونو د پراختیايي پروګرام «یو.ان.ډي.پي» په مالي ملاتړ، د ګربزو ولسوالی اړوندو سیمو کې د سبو او مېوو د وچولو مرکزونو د جوړولو په موخه سروې ترسره شوه.
یاده سروې د ګربزو ولسوالی په دوو کلیو، وړو کلي او کوجي کلي کې ترسره شوې ده، چې موخه یې د سبو او مېوو د پروسس او ساتنې لپاره اسانتیاوې برابرول، د کرنیزو محصولاتو د ضایع کېدو مخنیوی او د کلیوالو بزګرانو لپاره د عایداتي فرصتونو رامنځته کول دي.
د خوست ولایت د کرنې ریاست مشرتابه وایي، چې د دغو پروژو له پلي کېدو سره به د کرنیزو محصولاتو کیفیت او کمیت لوړ شي، بزګران به اقتصادي ځانبسیاینې ته ورسېږي او د حاصلاتو د بازارموندنې بهیر به لا پیاوړی شي.
د یادونې وړ ده، چې یاده سروې به د خوست ولایت په دریو ولسوالیو (ګربزو، باک او ځاځي میدان) کې ترسره شي، چې په پایله کې به د سبو او مېوو د وچولو پنځه مرکزونه جوړ شي.
