د ننګرهار کانال شرکت رییس: د کانال د عوایدو کچه د تېر کال په پرتله ډېر شوی
۲۸ مرغومې ۱۴۰۲ه.ش
۶ رَجَب المُرَجَّب ۱۴۴۵ ه.ق
د ننګرهار کانال شرکت رییس مولوی غلام الرحمن کظیم له رسنیو سره ددې شرکت د روان ۱۴۰۲ یم کال د لاسته راوڼو، کړنو او راتلونکو پلانونو د شریکولو پر مهال وویل، چې د یاد کانال د عوایدو کچه د تېرکال په پرتله ډېر شوی دی.
د کانال شرکت رییس وویل، چې تر دې دمه يې ۱۶۷۸ جریبه د کانال کرنیزه ځمکه له غاصبینو خلاصه او بېرته راګرځولي دي او د نورو غصب شویو ځمکو د راګرځولو لړۍ هم روانه ده.
مولوی غلام الرحمن کظیم دغه راز وویل، جې د کانال شرکت د ترکاڼۍ فابریکې چارې هم ښه پرمخ روان دي او د یادې فابریکې د توکو پېر-پلور په پار د جلال آباد به ښار کې هټۍ پرانیزي، چې د فابریکې د توکو د پلور ترڅنګ د خلکو فرمایشونه هم ومنل شي.
هغه دغه راز وویل، چې د زیتونو تېلو اخیستلو او ترلاسه کولو په موخه به په ټول هېواد کې او له هېواده بهر هم پلور ځایونه برابر کړي.
ښاغلی کظیم دغه راز وویل، چې د ننګرهار کانال شرکت هډې فارم عبدالخېلو بلاک په سل جریبه ځمکه کې د ټول هېواد په کچه د لومړي ځل لپاره د سبو د اصلاح شويو تخمونو توليد او تکثيرپېل شوی دی، چې د دې تخم توليد او تکثير سره به په ځان بسيا او نورو هېوادونو ته به هم د افغانستان په نوم صادر شي.
هغه زیاته کړه: «دهېوادونه کرنه، صنعت او سوداګرۍ پرمختګ کوي موږ هم هډې فارم کې پخپلو شنو خونو کې هایبریډ تخمونه کرلي چې د معلوماتو له مخې په نږدې ګاونډیو هېوادونو کې نشته.»
د ننګرهار کانال شرکت رییس وړاندي وویل، دغه اداره توانېدلې چې د خپلو بڼونو له حاصلاتو او نورو قراردادي سرچينو څخه په ۱۴۰۲ مالي کال کې عوايد راټول کړي.
مولوي عبدالرحمن کظیم د کانال شرکت د مالدارۍ برخې له پرمختګ هم یادونه وکړه، چې د یو شرکت په مټ يې په دوهم فارم کې پخوانې فارم بیا فعال کړی، او په درېيم فارم کې هم په نږدې وخت کې د مالدارۍ پخوانې فارم فعال شي .
کانال د هېواد له سترو زراعتي، اقتصادي او اجتماعي پروژو څخه ده، چې په مرکز جلال اباد او ۷ ولسوالیو کې تاسیسات لري، او کابو ۸۷ زره جریبه ځمکې، ۴ فعاله میکانیزه زراعتي فارمونه، د زیتونو پروسس فابریکه، ساختماني، نجارۍ، ورکشاپ، مالدارۍ فارمونه، اکمالاتي ډیپو، حفظ او مراقبت، درونټې برېښنا بند، د ستروسو د منظمولو او درجه بندۍ فابریکې او رهایشي قصبې لري.
