پکتیا کې د ځمکې غصب مخنیوی او غصب شویو ځمکو بېرته راګرځولو په پار هڅې
۱ چنګاښ ۱۴۰۲ه.ش
۴ ذیالحِجّة ۱۴۴۴ ه.ق
د پکتیا ولایت د غصب مخنیوي او غصب شویو ځمکو د تشخیص او تثبیت تخنیکي پلاوی په پکتیا ولایت کې د مشکوکو امارتي او عامه ځمکو د غصب مخنیوي او غصب شویو ځمکو بېرته راګرځولو په پار د دقیق سکېچ، کروکي، څلور خواوو او مساحت اخستلو لپاره ګرځنده تخنیکي پلاوی بېلابېلو سیمو ته سفرونه ترسره کوي. په همدې موخه یاد پلاوی د خپلو فعالیتونو په لړ کې د پکتیا ولایت د زرمت ولسوالی اړوند هیبت خېلو، هسکوې، پاینده خېلو او دولت خان سیمو ته د غصب او تصرفاتو مخنیوي او همدارنګه د نوموړې سیمې دقیق حدود، مساحت، نوعیت کیفیت، سکېچ او کروکي اخیستو په پار سفر ترسره کړ او په یادو سیمو کې متصرفینو ته د املاکي څېړنو په پار استعلامونه ورکړل.
یاد پلاوي د هیبت خېلو راغه کې د متصرفینو د خپل سري تصرف مخنیوی وکړ او د متصرفینو تخنیکي وسایل او وسایط ضبط او اړونده حوزې ته وسپارل شول او د لسګونه جریبه مشکوک امارتي ملکیت د غصب مخنیوي وشو.
ورپسې ګرځنده تخنیکي پلاوي د هسکوې سیمه کې د کارېزونو او اوبو د سرچينو څخه لیدنه وکړه او د نوموړو سیمو دقیق کوردینات او نقاط یې واخیستل. ګرځنده تخنیکي پلاوي د خپل سفر په لړ کې د پاینده خېلو سیمه کې په سپینو ځمکو کې د تصرف مخنیوی وکړ او د يادې سیمې سکېچ او کروکي واخیستل او د سیمې خلک د تصرفاتو څخه منع شول.
په پای کې ګرځنده تخنیکي پلاوي د دولت خان سیمې ته سفر وکړ او په یاده سیمه کې د خوړ یا رود سیمه کې یې د نوي پیل شوي تصرف مخنیوی وکړ او د متصرفینو سره د املاکي تحقیقاتو په پار لومړنی لیدنه وشوه.
ګرځنده تخنیکي پلاوي د دقیقو املاکي څېړنو په موخه په پورته یادو سیمو کې متصرفینو ته استعلامونه ورکړل او د همدارنګه یې د ملکیت د اثبات د مدار حکم اسنادو غوښتنه وکړه او په يادو سیمو کې د املاکي څېړنو تر بشپړېدو او د ذیصلاح ارګانونو تر وروستي پرېکړې پورې هر ډول نوی تصرف بند شو.
