ارزګان کې د غنمو د تولیداتو د زیاتوالي په پار هڅې په څلور زره بزګرانو د غنو اصلاح شوي تخمونه وېشل شوي دي
۳۰ تله ۱۳۹۹
د ارزګان دکرنې، اوبولګولو او مالدارۍ ریاست وايي، چې په دې ولایت کې د غنمو د تولیداتو د زیاتوالي او د بزګرانو د ملاتړ په پار سږکال ددې ولایت په څلور زره اړمنو بزګرانو د غنمو اصلاح شوي تخمونه، توره او سپینه سره او کرنیزې کڅوړې وېشل شوي دي.
ددغو مرستو موخه په دې ولایت کې د غنمو د تولیداتو زیاتوالی او د بزګرانو ملاتړ دی.
په ورته وخت کې په روان مالي کال کې د ارزګان د کرنې ریاست د بوټوساتنې مدیریت په دې ولایت کې د کرنیزو ناروغیو او افتونو د مخنیوي په پار ۷۰۰ بزګرانو ته ژمني تېل او بورډ مکسچر درمل هم ورکړي دي، چې ورسره د بزګرانو کروندې خوندي شي.
په همدې حال کې ټاکل شوې، چې ددې ولایت د غنمو د تولیداتو د زیاتوالي په پار په پنځه زره او ۸۶۰ بزګرانو ۲۹۳ مټریک ټنه د غنمو اصلاح شوي تخمونه ووېشل شي، چې د سروې چارې یې بشپړ شوي دي او په روان کال کې به په دغو بزګرانو ووېشل شي.
