د ننګرهار وادي کرنیز شرکت د ۲۳مې ویالې د ۵۲۰ شمېرې سیفون د بیارغونې چارې پیل شوې

۱۱ تله ۱۴۰۵ هـ.ش
۲۰ رَبِیعُ الْثاني ۱۴۴۸ هـ.ق
د ننګرهار وادي کرنیز شرکت د څلورم فارم اړوند د بټي کوټ ولسوالی په لوړتۍ سیمه کې د ۲۳مې ویالې د ۵۲۰ شمېرې سیفون د بیارغونې چارې پیل شوي، چې د اټکل له مخې به یې رغنیزې چارې د ۷۵ کاري ورځو په موده کې بشپړې شي.
د پروژې د سپارلو په مراسمو کې د پروژې د نظارت مسؤلو انجنیرانو، د ننګرهار وادي کرنیز امارتي شرکت چارواکو، د قراردادي شرکت مسؤلینو او یو شمېر نورو اړوندو کسانو ګډون کړی و.
د ننګرهار وادي کرنیز شرکت چارواکو وویل، چې یاد سیفون د وروستیو اورښتونو او د زیاتو اوبو د راوتلو له امله زیانمن شوی دی.
نوموړي زیاته کړه، چې د سیفون له ترمیم او بیارغونې سره به د سیمې د اوسېدونکو د تګ راتګ ستونزې تر ډېره هوارې شي او همدارنګه به د کورونو او کرنیزو ځمکو پر وړاندې د زیاتو اوبو د احتمالي ګواښ کچه راټیټه شي.
بلخوا، د «خالد بهار ساختماني او لوژستیکي شرکت» مسوول انجنیر عرفان الله مشعل وویل، چې د پروژې د تطبیق پر مهال به هره ورځ شاوخوا ۲۵ کسانو ته د کار زمینه برابره شي.
د نوموړي په وینا، د پروژې په کاري اجزاوو کې د سنګارۍ دېوالونو جوړول، کندن‌کاري، د اوسپنیز کانکریټ کارونه، انګاف او نور اړین ساختماني فعالیتونه شامل دي.
هغه څرګنده کړه، چې د پروژې ټولې چارې به د ټاکل شوي مهال‌وېش له مخې په ۷۵ کاري ورځو کې بشپړې شي.
د مسؤلینو په وینا، د پروژې له بشپړېدو وروسته به یاد سیفون له اساسي ترمیم او بیارغونې سره بېرته د خلکو د استفادې او ګټې اخیستنې وړ وګرځول شي.
باید وویل شي، چې څو ورځې وړاندې د چپرهار سیفون د بیارغونې چارې هم پیل شوې وې، چې کارونه یې په منظم ډول روان دي.
سیفونونه د اوبولګولو او سیمه‌ییزو ترانسپورتي لارو د اوبو د منظم تېرېدو په برخه کې مهم رول لري. د بارانونو او سېلابونو له امله د دغو تاسیساتو زیانمنېدل د خلکو د تګ راتګ ترڅنګ کرنیزو ځمکو او کورونو ته هم د اوبو د ننوتلو ګواښ رامنځته کوي؛ له همدې امله یې پر وخت ترمیم او بیارغونه د کرنیزو سیمو د خوندیتوب او د اوبو د مدیریت لپاره مهمه ده.