ننګرهار کې پر یوشمېر راستنو شوو کورنیو د چرګانو د روزنې وسایل ووېشل شول

۲۰ چنګاښ ۱۴۰۵ هـ.ش
۲۵ مُحَرَّمُ الحَرام ۱۴۴۸ه‍.ق
 د ننګرهار د کرنې، اوبو لګولو او مالدارۍ ریاست په همغږۍ، د مدیریت، پرمختګ او نوښتونو «اومید» مؤسسې له لوري د جلال‌اباد ښار د اتمې ناحیې ۱۵ راستنو شوو کورنیو ته د چرګانو د روزنې اړین وسایل ووېشل شول.
د ننګرهار د کرنې، اوبو لګولو او مالدارۍ رییس، مولوي عبدالستار محمد، وویل چې هرې ټاکل شوې کورنۍ ته د چرګانو د ساتنې لپاره یوه د مرغانچې دروازه، دوه جالۍ لرونکې کړکۍ، دوه د اوبو لوښي، دوه د دانې لوښي، پنځه متره جالۍ، موزې، ماسک او دستکشې ورکړل شوې دي.
نوموړي زیاته کړه، چې د پروژې په راتلونکي پړاو کې به هرې برخمنې شوې کورنۍ ته ۳۰ قطعه چرګان او ۱۵۰ کیلوګرامه متراکمه خوراکه هم ووېشل شي، څو د چرګانو د روزنې چارې په معیاري ډول پرمخ یوسي.
د ننګرهار د کرنې ریاست د مسؤولینو په وینا، د دغو مرستو موخه د چرګانو د روزنې له لارې د راستنو شوو او بېوزلو کورنیو ملاتړ، د هغوی د لومړنیو اړتیاوو په پوره کولو کې مرسته، د مالدارۍ سکټور پیاوړتیا او د خوړو د خوندیتوب ښه کول دي.
د یادونې وړ ده، چې د ننګرهار د کرنې، اوبو لګولو او مالدارۍ ریاست د همکارو مؤسسو په ملاتړ د کوچنیو عایداتي پروژو پلي کولو ته دوام ورکوي، ترڅو د راستنو شوو او اړمنو کورنیو لپاره د دوامدار عاید او ځان‌بسیاینې زمینه برابره شي.