د هلمند د موساکلا ولسوالی یوشمېر بڼوالو ته د شاتو مچیو وېش؛ د کوچنیو کاروبارونو د پیاوړتیا نوې هڅه

۲۳ غویی ۱۴۰۵ه‍.ش
۲۶ ذُو ٱلْقَعْدَةِ ۱۴۴۷ه‍.ق
د هلمند ولایت د کرنې، اوبولګولو او مالدارۍ ریاست تر چتر لاندې، د «ډاکار» مؤسسې په تخنیکي همکارۍ د هلمند د موسا کلا ولسوالی یوشمېر اړمنو کورنیو ته د کوچني کاروبار د پیل په موخه د شاتو مچۍ او اړین وسایل ووېشل شول.
ددغو مرستو په وېش غونډه کې د هلمند دکرنې ریاست چارواکي  وویل، چې د شاتو مچیو روزنه یو مهم او ګټور مسلک دی او کولی شي د کورنیو اقتصادي وضعیت په ښه کولو کې رغنده رول ولوبوي. هغه له مستفیدینو وغوښتل، چې د مسلکي لارښوونو سره سم د مچیو ساتنه او پالنه وکړي، څو له دې برخې څخه اعظمي ګټه ترلاسه کړي.
د هلمند  دکرنې ریاست چارواکي وایي، د ورته پروګرامونو دوام به نه یوازې د کورنیو عاید لوړ کړي، بلکې په سیمه کې به د شاتو تولید زیات او د بازار موندنې فرصتونه به هم پراخ شي.
په افغانستان کې د کلیوالو کورنیو د اقتصادي پیاوړتیا او د عایداتي سرچینو د تنوع لپاره د کرنې اړوند کوچني کاروبارونه مهم رول لري. د شاتو مچیو روزنه له هغو اغېزناکو برخو څخه ده، چې د کم لګښت په بدل کې د دوامدار عاید زمینه برابروي او د خوړو خوندیتوب ته هم وده ورکوي