لغمان کې د مثمرو بڼونو د جوړولو پسرلنۍ کمپاین پیل شو

۱۲ سلواغه ۱۳۹۸
د کرنې، اوبولګولو او مالدارۍ وزارت د بڼوالۍ او مالدارۍ ملي پروژې (NHLP) له خوا په لغمان ولایت کې د مېوه لرونکو بڼونو د جوړولو پسرلنۍ کمپاین پیل شوی دی.
د کرنې وزارت د بڼوالۍ او مالدارۍ ملي پروژه (NHLP) په پام کې لري، چې ۱۳۹۹ یم کال کې د لغمان ولایت ځمکوالو او بزګرانو لپاره د بېلابېلو مېوو ۵۰۰ جریبه بڼونه جوړ کړي، د بزګرانو او ځمکوالو د غوښتنې پر اساس ښایي دا شمېره ډېره شي.
د کرنې وزارت هلې ځلې کوي، چې لغمان ولایت کې بڼوالۍ ته وده ورکړي، هغه ونې ترویج کړي، چې په لنډه موده کې مېوه نیسي او ښه کمیت او کیفیت لرونکي وي، تر څو د بڼوالۍ محصولات ډېر او د بڼوالو عواید زیات شي.
د کرنې وزارت له خوا د نوي بڼونو جوړول، د زړو بڼونو بیارغول او پر بڼوالو د بڼوالۍ اړونده توکي وېشل د بڼوالۍ د سکټور د پیاوړتیا او د نوي بڼونو د پېژندنې لامل شوي دي او له دې لارې بزګرانو ته د کار زمینه هم برابره شوې ده.
د بڼونو جوړولو پسرلنۍ کمپاين به په نژدې ورځو کې ننګرهار او کونړ ولايتونو ته هم وغځېږي.