خوست کې د حیواني کلینیک د ترمیم او بیا رغونې چارې په معیاري ډول روانې دي
۶ سلواغه ۱۴۰۴ه.ش
۷ شَعبان المُعَظّم ۱۴۴۷ه.ق
د خوست ولایت د کرنې، اوبو لګولو او مالدارۍ ریاست د حیواني روغتیا او مالدارۍ آمریت له لوري، د یاد ریاست په انګړ کې د حیواني کلینیک د ترمیم او بیا رغونې چارې په منظمه، معیاري او تخنیکي بڼه دوام لري.
د یاد کلینیک د ترمیم چارې د خوست د کرنې، اوبو لګولو او مالدارۍ ریاست د رهبرۍ تر مستقیم نظارت لاندې پر مخ وړل کېږي، تر څو یاد کلینیک د وټرنرۍ خدمتونو د وړاندې کولو لپاره په لا مناسب، معیاري او مجهز حالت کې برابر شي.
د دې پروژې اساسي موخه دا ده، چې د حیواني ناروغیو د تشخیص، درملنې او مخنیوي لپاره یو معیاري او مناسب کاري چاپېریال رامنځته شي، څو مالدارانو ته پر وخت، اغېزمن او باکیفیته وټرنرۍ خدمات وړاندې شي. د کلینیک د ترمیم په بهیر کې به د ودانۍ ټولې ودانیزې برخې او اړوند تاسیسات په اساسي ډول ورغول او معیاري شي.
د یاد حیواني کلینیک له بشپړې بیا رغونې وروسته به د مالدارۍ سکتور لا پیاوړی شي، د څارویو روغتیا به نوره هم ښه شي او په پایله کې به د مالدارانو په اقتصادي وضعیت کې هم مثبت بدلون رامنځته شي.
د خوست ولایت د کرنې، اوبو لګولو او مالدارۍ ریاست ژمن دی، چې د خپلو شته امکاناتو په چوکاټ کې د مالدارانو د خدمت، ملاتړ او د مالدارۍ سکتور د پراختیا لپاره لا اغېزمن او دوامدار ګامونه پورته کړي.
