هلمند کې د کرنیزو اوبو د منظم مدیریت لپاره د زابرونو پاککاري او د ژمنیو تېلو د پاشلو پروګرام چټک شوی

۲۳ مرغومې ۱۴۰۴ه‍.ش
۲۳ رَجَب المُرَجَّب ۱۴۴۷ه‍.ق 
د هلمند ولایت د کرنې، اوبو لګولو او مالدارۍ ریاست د هڅو په پایله کې، د قدرتي سرچینو آمریت اړوند فعالیتونه د مارجې ولسوالی د وکیل وزیر څلورلارې د کلي د زابرونو د پاککارۍ په برخه کې په چټکۍ سره روان دي.
یادې چارې د دې لپاره ترسره کېږي، تر څو کرنیزو ځمکو ته د اوبو منظم او پر وخت جریان برابر شي، د اوبو د ضایعاتو مخه ونیول شي او د بزګرانو کرنیز حاصلات زیات شي. د زابرونو د پاککارۍ له بشپړېدو سره به د اوبو بندښتونه له منځه ولاړ شي او کرنیزې ځمکې به په عادلانه او منظم ډول خړوبې شي.
د هلمند کرنې ریاست چارواکي وایي، چې د زابرونو پاکوالی نه یوازې د اوبو د سم مدیریت لامل ګرځي، بلکې د خاورې د تخریب مخه هم نیسي، د ځمکو حاصلخيزي لوړوي او د بزګرانو اقتصادي وضعیت پیاوړی کوي. دا اقدام د سیمې د دوامدارې کرنې او د اوبو د اغېزمن مدیریت په برخه کې یو مهم او ګټور ګام بلل کېږي.
په ورته وخت کې، د هلمند د کرنې، اوبو لګولو او مالدارۍ ریاست د کرنیزو چارو آمریت د تخنیکي او مسلکي کارکوونکو په همکارۍ، د ژمي له موسم سره سم پر بڼونو او باغچو د ژمنیو تېلو د پاشلو پروګرام هم پلي کوي، چې په نږدې راتلونکي کې به نورو ولسوالیو ته هم وغځول شي او ګڼې سیمې به تر پوښښ لاندې راولي.
تر دې مهاله دغه پروګرام د ناوې ولسوالی د اچکزو د ښاخ په سیمه کې عملي شوی، چېرې چې بڼونو ته د ژمنیو تېلو د محلول د جوړولو طریقه او پر مېوه‌دارو ونو او بڼونو د هغې د استعمال څرنګوالی په فني او مسلکي ډول ور وښودل شو.
د یاد پروګرام موخه دا ده، چې په راتلونکي کې وقایه شوي باغونه له ناروغیو او افتونو څخه خوندي پاتې شي او حاصلات یې د کمیت او کیفیت له پلوه لا ښه او زیات شي.