هلمند او کندهار کې د مېوه لرونکو نیالګیو قوریو څخه څارنه وشوه
۲۶ تله ۱۴۰۴ هـ.ش
۲۵ رَبِیعُ الْثاني ۱۴۴۷ هـ.ق
د هلمند ولایت کرنې، اوبولګولو او مالدارۍ ریاست اړوند د سوېل لویدیځ زون د تخمونو تصدیق ورکولو آمریت کارکوونکو د ۱۴۰۴ کال د پلټنې له مخې د کندهار او هلمند ولایتونو په کچه د مېوه لرونکو نیالګیو له روزنځایونو (قوریو) څخه څارنه ترسره کړه.
د یادې څارنې موخه د تصدیق شوو نیالګیو د کیفیت ارزونه، د قوریو د فعالیت څارنه او د نیالګیو د تصدیق پروسې د شفافیت ډاډ ترلاسه کول وو.
په یاده پروسه کې د هلمند ولایت په کچه له شاوخوا شپږو تصدیق شوو قوریو څخه څارنه ترسره شوی دی، او همدارنګه په کندهار ولایت کې هم ورته تفتیش ترسره شو.
د یاد آمریت مسؤلینو وویل، چې د هلمند او کندهار د تصدیق شوو قوریو څخه په کال کې یو ځل منظمه پلټنه ترسره کېږي.
دد څارنې په ترڅ کې څرګنده شوه، چې د قوریو په سیمو کې بېلابېل مېوه لرونکي نیالګي شته، چې پکې د شفتالو، انګورو، انارو، بادامو، زردالو او فلم بېلابېل ډولونه شامل دي.
مسؤلینو څرګنده کړه، چې دغه ډول تفتیشونه د نیالګیو د کیفیت لوړولو، د کرنیزو محصولاتو د تولید د زیاتوالي او د تصدیق شوو قوریو د تشویق لپاره ډېر مهم رول لري.
