خوست کې د عشر او زکات د چارو د همغږۍ غونډه ترسره شوه
د کرنې، اوبو لګولو او مالدارۍ وزارت د عشر او زکات لوی رییس مولوي ندا محمد عابد د خوست ولایت د عشر او زکات مسؤلینو، آمرینو او مدیرانو سره د کارونو د لا ښه والي او همغږۍ په موخه غونډه ترسره کړه. په دې ناسته کې د راټولونې پروسې د اغېزمنتیا، شفافیت او همغږۍ د پیاوړتیا په اړه هر اړخیز بحث وشو.
یاده غونډه د خوست ولایت د کرنې، اوبو لګولو او مالدارۍ ریاست په تالار کې د قران کریم د څو مبارکو آیتونو په تلاوت سره پیل شوه. د خوست دکرنې ریاست مرستیال مولوي اسلم خان منیب د غونډې ګډونوالو ته ښه راغلاست ووایه او د عشر او زکات لوی رییس او مل پلاوي ته یې د ورتګ هرکلی وکړ.
وروسته د عشر او زکات لوی رییس مولوي ندا محمد عابد وینا وکړه. نوموړي د عشر او زکات د شرعي، ټولنیزو او اقتصادي اغېزو په اړه مفصلې خبرې وکړې، د عمومي ریاست لاسته راوړنې یې بیان کړې او د راټولولو پروسې د لا ښه تنظیم او اغېزمنتیا لپاره یې د خوست ولایت مسؤلینو ته لازمې سپارښتنې وکړې.
په دوام کې، د خوست ولایت د عشر او زکات عوایدو تنظیم او محاسبې آمر قاري سید مرجان خالد د ۱۴۰۲، ۱۴۰۳ او ۱۴۰۴ هجري لمریز کلونو د راټول شوو عشر او زکات راپورونه، لاسته راوړنې، ستونزې او غوښتنې وړاندې کړې.
همدارنګه، د ولسوالیو د مدیرانو په استازیتوب د سپیرې ولسوالی د عشر او زکات مدیر مولوي جنت خان جلالي د سیمه ییزو کارکوونکو ستونزې او وړاندیزونه شریک کړل.
د عشر راټولولو نظارت او بررسي عمومي مدیر محمود ستانکزي د مصارفاتي چارو او معاشاتو اړوند وضاحت ورکړ او د لا ښه تنظیم لپاره یې عملي وړاندیزونه وکړل.
په وروستۍ برخه کې، مولوي ندا محمد عابد د ګډونوالو له نظریاتو او راپورونو وروسته غونډه مثبته وبلله او څرګنده یې کړه، چې د دې ډول غونډو دوام د سیمه ییزو ستونزو د ژر حل، د راټولولو د شفافیت او د ادارو ترمنځ د همغږۍ لپاره ډېر ارزښت لري.
غونډه د عشر راټولولو د شرعي متخصص مولوي محمد اسلم مخلص له لوري د اسلامي نظام د بقاء او دوام په دعا سره پای ته ورسېده.
