مارجې ولسوالۍ کې د څارویو او کرنیزو درمل پلورنځیو څارنه وشوه
۶ مرغومې ۱۴۰۳ه.ش
۲۴ جُمَادَى الثاني۱۴۴۶ه.ق
د هلمند ولایت مارجې ولسوالۍ کې د څارویو او کرنیزو درملو غیر مسلکي پېر او پلور مخنیوي لپاره د ځانګړي کمپاین په لړ کې له ګڼو درمل پلورنځیو څخه څارنه ترسره شوه.
د کرنې، اوبو لګولو او مالدارۍ وزارت لخوا په دغه کمپاین کې درمل پلورونکو ته د کرنیزو او څارویو درملو د پېر او پلور لپاره ځانګړې کړنلاره تشریح شوه. همداراز، سپارښتنه وشوه، چې په مېله بازارونو کې د درملو پېر او پلور بند کړي، که نه نو درمل به یې ضبط او عاملین به قانوني چلند سره مخ شي.
په پلورنځیو کې تر وخت تېر او بې‌کیفیته درملو په موخه هم څارنه وشوه او د پلورنځیو مسؤلینو ته د جوازونو نوي کولو او نورو اړینو برخو اړوند مشخصې لارښوونې وشوې.
د یادونې وړ ده، چې د دې پروسې موخه پر بزګرانو او مالدارانو د بې‌کیفیته، تر وخت تېر او بې‌جوازو درملو پلور مخنیوی و، ترڅو بزګران او مالداران زیانمن نه شي.
