ننګرهار کې ۲۰۰ زره وړو شخوند وهوونکو څارویو ته د طاعون واکسینونه پلي کېږي
د ننګرهار د کرنې، اوبو لګولو او مالدارۍ ریاست سره په همغږۍ د ملګرو ملتونو د کرنې او خوړو ادارې له لورې ۲۰۰ زره وړو شخوند وهوونکو څارویو ته د ناروغیو مخنیوي په موخه تطبیق شي.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې یاد واکسین د ننګرهار په ۱۷ ولسوالیو کې کوچې مالدارانو څارویو او نورو وړو شخوند وهوونکو څارویو ته پلي کېږي.
نوموړې وترنر داکترانو ته د واکسینونو د سوړ ځنځیر ساتلو، واکسینونو ښه تطبیق، عامه پوهاوي او نورو اړونده برخو کې لازمې سپارښتنې وکړې.
ښاغلي محسن زیاته کړه، چې د مالدارۍ سکتور دپیاوړتیا لپاره په بېلا بېلو برخو کې مالدارانو ته خدمات وړاندې کوي.
د ملګرو ملتونو د کرنې او خوړو ادارې د مالدارۍ برخې مسؤل داکتر عبدالمعروف ابراهیم خېل وویل، چې د واکسینونو ښه تطبیق په موخه یي ۳۳ تنو وترنر داکترانو ته عملي او نظري روزنه هم ور کړې ده.
هغه وویل، چې په نږدې راتلوونکي کې ۱۰۰ زره دوزه دغواګانو او مېښو ددانو دپوستکي ناروغۍ مخنیوي واکسینونه هم تطبیقوي.
د ننګرهار د کرنې ریاست مالدارۍ امر داکتر محمد ضمیر بهسودي د کرنې وزارت د کړنلارو او قوانینو په برخه کې داکترانو ته معلومات وړاندې کړل.
د کوچیانو چارو دسمون ریاست امرمولوي سردار ولي انقلابي د کوچیانو ستونزې، غوښتنې او وړاندیزونه د ننګرهار کرنې رییس او د ملګرو ملتونو دفتر مسؤلینو سره شریک کړل.
